Tags-Duniya

karne ko rafū kar hī leñge duniyā vaale sab zaḳhm apne
jo zaḳhm dil-e-insāñ pe lagā us zaḳhm kā siina mushkil hai

duniyā kā dastūr yahī hai dil yuuñ kab tak ro.egā
in achchhī sūrat vāloñ ne kis se piit nibhā.ī hai

tum āḳhir kyuuñ kuḌhte ho 'tālib' ke rone-dhone par
duniyā is par hañstī hai sab kahte haiñ saudā.ī hai

jo nahīñ hai mire dil kī duniyā
kyuuñ na maiñ 'jaun' miTā duuñ us ko

ab to bas ek hī ḳhvāhish hai ki tujh ko dekheñ
saarī duniyā meñ phire aur na kyā kyā dekhā

āḳhir us ko bhī hai kuchh 'ja.afarī' duniyā kā ḳhayāl
der tak raat ga.e saath rahegā kaise

marte dam duniyā nihāyat tañg thī
qabr kā vo ek konā yaad hai

jalva-e-dār-o-rasan apne nasīboñ meñ kahāñ
kaun duniyā kī nigāhoñ pe chaḌhātā hai mujhe

duniyā se, jis se aage kā sochā nahīñ gayā
ham se vahāñ pahuñch ke bhī Thahrā nahīñ gayā

mutma.in haiñ bahut hī duniyā se
phir bhī kitne udaas haiñ kuchh log

anāsir hañste haiñ duniyā kī vus.at muskurātī hai
kisī se pūchhte haiñ ahl-e-bīnash jab nishāñ merā

is bharī duniyā se vo chal diyā chupke se yuuñ
jaise kisī ko bhī ab us kī zarūrat na thī

dekhte dekhte duniyā badlī gulshan kyā vīrāna kyā
parbat parbat naqsh the jin ke miTte miTte ḳhaak hue

bahut be-rabt hai andar kī duniyā
chalo parda uThā lete haiñ thoḌā

suno duniyā ke naqshe se kisī din
samundar ko haTā lete haiñ thoḌā

phailtī jā rahī hai ye duniyā
jashn-e-āvārgī manāne meñ

ab ye hañgāma-e-duniyā nahīñ dekhā jaatā
roz apnā hī tamāshā nahīñ dekhā jaatā

duniyā ne muñh pe Daalā hai parda sarāb kā
hote haiñ dauḌ dauḌ ke tishna-dahan ḳharāb

aur sab kuchh mile hai duniyā meñ
lekin ik āshnā nahīñ miltā

jo aaj siine ke ek kone meñ ḳhāmushī se paḌā huā hai
ye dil surayyā ke paar duniyā meñ paañv dhartā javāñ huā thā