Tags-Duniya

kyā zarf hai har zulm pe ḳhāmosh hai duniyā
is daur kā insān pur-asrār lage hai

ye arsa-gāh-e-talab qurbatoñ kī duniyā hai
yahāñ ham aisā koī be-hunar nahīñ aatā

maiñ ne duniyā sameT lī to khulā
kaam kī koī chiiz thī hī nahīñ

zulf-e-jānāñ dīda-e-nam dard-e-dil
in se bāhar aa.eñ to duniyā dikhe

ḳhuub hai duniyā kī ye jādūgarī
vo nahīñ hotā hai jo hotā dikhe

sunā rahī hai jise joḌ joḌ kar duniyā
tamām TukḌe haiñ vo merī dāstān ke hī

kisī se koī nahīñ bāz-purs duniyā meñ
zamāna pīchhe paḌā hai hamārī jaan ke hī

bhaukeñ mahloñ pe na mun.im sag-e-duniyā ho kar
haDDiyāñ qabr meñ rah jā.eñgī chūnā ho kar

is baar bhī duniyā ne hadaf ham ko banāyā
is baar to ham shah ke musāhib bhī nahīñ the

anā kī sar-kashī ummīd-e-armāñ ḳhvāb kī duniyā
dhaḌakte dil fusūn-e-zindagī meñ aks kis kā hai

duniyā ne tere ġham se bhī begāna kar diyā
ab dil meñ tere vasl kī chāhat nahīñ rahī

asrār agar samjhe duniyā kī har ik shai ke
ḳhud apnī haqīqat se ye be-ḳhabarī kyuuñ hai

duniyā meñ jo samajhte the bār-e-girāñ mujhe
vo hī sunā rahe haiñ mirī dāstāñ mujhe

ḳhāmoshiyoñ se rābta qaa.em jo kar liyā
duniyā samajh rahī hai abhī be-zabāñ mujhe

maiñ jab vo jannat bhī chhoḌ aayā to duniyā kyā hai
le maiñ chalā tū sambhāl apnā jahān allāh

hamāre dil meñ nahīñ hai kiina ki jaise be-jurm ho nagīna
ye bahr-e-hastī kā hai safīna isī pe duniyā phaḌak rahī hai

ġham-zada uTh ga.e duniyā hī se ham āḳhir aah
zānū-e-ġham se va-lekin na uThā sar apnā

sukūñ se rahte haiñ kis tarah log duniyā meñ
mire liye to ye sāñseñ bhī ik azaab rahīñ

gandumī rañg jo hai duniyā meñ
merī chhātī pe muuñg daltā hai

zarā dekheñ to duniyā kaise kaise rañg bhartī hai
chalo ham apne afsāne kā ġham unvān rakhte haiñ