Tags-Duniya

rāt-bhar sham-e-hazīñ is fikr meñ jaltī rahī
kyuuñ buland āḳhir hai is duniyā meñ parvāne kā nā

mirī ḳhāmoshiyoñ par duniyā mujh ko ta.an detī hai
ye kyā jaane ki chup rah kar bhī kī jaatī haiñ taqrīreñ

shahr kyā duniyā badal kar dekh lo
phir kahoge ham to ab uktā ga.e

tere ḳhayāloñ meñ Duube to
duniyā saarī ghuum lī ham ne

duniyā vāloñ se ta.alluq nahīñ rakkhā maiñ ne
mujh ko duniyā se ġharaz kyā mirī duniyā tum ho

har aks-e-muqābil se numāyāñ hai mirā naqsh
duniyā meñ huuñ yā ā.ina-ḳhāne meñ khaḌā huuñ

āḳhir uuprī hamdardī ko rañg to ik din laanā thā
baat thī pahle chand gharoñ tak ab duniyā bhauñchāl meñ hai

ranj-e-duniyā fikr-e-uqbā jaane kyā kyā dil meñ hai
zindagī do din kī apnī saikḌoñ mushkil meñ hai

kuchh to dard diye haiñ mujh ko duniyā vāloñ ne
lekin kuchh aise ġham haiñ jo mere zaatī haiñ

nā-murādī se kaho muñh pher le apnā zarā
merī duniyā meñ urūs-e-kāmrānī aa.egī

jab ḳhizāñ kī nazr ho jā.egī duniyā se shabāb
yaad 'aḳhtar' ye sitam-ārā javānī aa.egī

is duniyā meñ kaam na aa.e
aañsū tere aañsū mere

mujh ko duniyā se kyā matlab
dil bhī merā tum bhī mere

vahī jo detā hai duniyā ko uljhanoñ se najāt
kabhī kabhī vahī uljhan meñ Daal detā hai

duniyā se haT ke ik na.ī duniyā banā sakeñ
kuchh ahl-e-ārzū isī hasrat meñ mar ga.e

maiñ jab bhī tajziya kartā huuñ terā ai duniyā
is ā.īñe meñ tujhe bad-chalan sī paatā huuñ

ḳhulūs-o-rabt-o-mohabbat jinheñ mayassar hai
vo log kaun sī duniyā ke rahne vaale haiñ

ghar se nālāñ the magar dekhī hai duniyā ham ne
hai agar koī amāñ-gāh to bas ghar apnā

duhā.iyāñ jo nahīñ deñ 'zafar' sitam sah kar
samajh rahī hai ye duniyā ḳhafā na ham haiñ na tum

ik sabr ke ghūñT se miT jaatī tab tishna-laboñ kī tishna-labī
kam-zarfi-e-duniyā ke sadqe ye ghūñT bhī piinā mushkil hai