Tags-Duniya

rukī huī hai jo ek mauj-e-sarāb kī sat.h par ye duniyā
to maiñ bhī us ḳhvāb ke nagar kā subūt lā.ūñgā dāstāñ se

mire liye to ye duniyā sarāb jaisī hai
ab is pe ḳhaak na Dāleñ to aur kyā kar leñ

āñkheñ hoñToñ ke taale bhī khulte dekheñgī
duniyā chhīn to le goyā.ī ham majbūroñ se

saarī duniyā hai siyāhī ke samundar kī tarah
chhīn lī vaqt ne ek ek kiran āḳhir-e-shab

dil bhī qassam-e-azal ne vo diyā qismat se
jis ne duniyā meñ na rakkhā kisī qābil mujh ko

ḳhudāyā! na maiñ ne kahīñ sar jhukāyā
na duniyā meñ ehsān ab tak kisī kā uThāyā

bachchoñ meñ ehsās ke paude jo ham ne tab rop diye the
duniyā vāloñ aao dekho ab us meñ phal aa.e haiñ

rozāna ik faqīr lagātā hai ye sadā
duniyā sarāb hai are duniyā sarāb hai

kuchh nahīñ hai aur to ġham hī sahī
is bharī duniyā meñ kuchh apnā to hai

duniyā ke naaz dekh ke hairān rah ga.e
goyā usī ke naaz uThāne chale the ham

ḳhud ko maiñ ḳhud se bhī milne nahīñ detā hargiz
apnī duniyā ko bhī duniyā se alag rakkhā hai

apnī duniyā se milī fursat-e-yak-jast hameñ
āsmāñ ke liye ik jast hī kaafī to nahīñ

tumhīñ to ho jise kahtī hai nāḳhudā duniyā
bachā sako to bachā lo ki Dūbtā huuñ maiñ

vaa.e duniyā ki rulte phirte haiñ
ḳhaak meñ kāsa-hā-e-sar sab ke

jaane vāloñ ke liye tū aur kyā le jā.egā
dekh le duniyā jahāñ tak rāsta le jā.egā

ek ajab sī duniyā dekhā kartā thā
din meñ bhī maiñ sapnā dekhā kartā thā

bazm kī aur hai tanhā.ī kī duniyā kuchh aur
raat bhar rotā rahā din meñ hañsāne vaalā

jo baat laboñ par aa.ī vo baat banī afsāna
ik giit ko is duniyā ne kitnī hī dhunoñ meñ gaayā

duniyā sabhī bātil kī talabgār lage hai
jis ruuh ko dekho vahī bīmār lage hai

vo terī vafā kī ho ki duniyā kī jafā kī
mat chheḌ koī baat ki talvār lage hai