Tags-Duniya

zindagī merī kaTī ek sazā ke mānind
chain se duniyā meñ pal-bhar bhī basar kar na sakā

sar se junūn-e-ishq kā saudā nikāliye
yā apne dil se ḳhvāhish-e-duniyā nikāliye

yā haath bāñdh lījiye duniyā ke sāmne
yā haath khol kar yad-e-baizā nikāliye

kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ

kahīñ khiñchā rahā duniyā se misl-e-dast-e-faqīr
misāl-e-dast-e-tamannā kahīñ baḌhā huā maiñ

ġhair-mumkin kuchh nahīñ duniyā meñ lekin 'ehtirām'
aap kī sohbat bhalā kaise bhulā dī jā.egī

maiñ mohabbat ke māroñ kī duniyā se huuñ
mujh se kiije vafā saḳht mushkil meñ huuñ

usī pe khultī haiñ duniyā kī vus.ateñ 'shāhid'
jo apnī zaat meñ har pal simaT ke dekhtā hai

soch kā hai ye pher ki yaaro pech-o-ḳham kī duniyā meñ
DhūñD rahe ho aisā rasta jis meñ nahīñ ghumāv bahut

apne-āp meñ uljhī huī ik duniyā hai har shaḳhs yahāñ
suljhe hue zehnoñ meñ bhī haiñ chhupe hue uljhāv bahut

merī duniyā sañg-o-āhan un kī duniyā chāñd-sitāre
aql kahāñ tak dāman khīñche ishq kahāñ tak haath pasāre

but-ḳhāne se dil apne uThā.e na ga.e
ka.abe kī taraf mizāj laa.e na ga.e

shabāb aayā kisī but par fidā hone kā vaqt aayā
mirī duniyā meñ bande ke ḳhudā hone kā vaqt aayā

use maiñ āgahī kā faiz samjhūñ yā sazā samjhūñ
hameñ duniyā kī nairañgī pe ab hairat nahīñ hotī

tire marīz ko duniyā meñ kuchh nahīñ lagtā
davā lage na raqīboñ kī bad-duā lagtī

use duniyā ke har ġham se mukammal paak to kar lo
agar is dil meñ buniyād-e-ġham-e-shabbīr rakhnī hai

gulshan kī faqat phūloñ se nahīñ kāñToñ se bhī zīnat hotī hai
jiine ke liye is duniyā meñ ġham kī bhī zarūrat hotī hai

hamārī nazroñ kī pākīzgī salāmat hai
isī kamāl pe duniyā ko ham jhukāte haiñ

nafāsat aah bhartī hai zalālat khilkhilātī hai
ye be-adabī kī duniyā meñ kabhī ḳhud ko tanā dekhūñ

ye ik duniyā dikhe bāhar vo ik duniyā mire bhītar
batā mujh ko mire mālik kahāñ apnā patā dekhūñ