Tags-Duniya

duniyā kī bahāroñ meñ kho kar maiñ apnī nazar se chhup jaatā
sad-shukr dil-e-āgāh mirā dil ban gayā jām-e-jam na huā

zamāne kā bharosā kyā abhī kuchh hai abhī kuchh hai
yahī hai rañg duniyā kā abhī kuchh hai abhī kuchh hai

tumheñ kyuuñ is qadar ġham hai 'hafīz' apnī tabāhī kā
yahī duniyā kā hai naqsha abhī kuchh hai abhī kuchh hai

jalte ḳhemoñ meñ hamārī nasl roñdī jā.egī
yaad rakkhegī hamāre baad ye duniyā hameñ

ik chādar-e-bosīda maiñ dosh pe rakhtā huuñ
aur daulat-e-duniyā ko pā-posh pe rakhtā huuñ

āñkhoñ ko Tikātā huuñ hañgāma-e-duniyā par
aur kaan suḳhan-hā-e-ḳhāmosh pe rakhtā huuñ

maiñ apne iḳhtiyār meñ huuñ bhī nahīñ bhī huuñ
duniyā ke kārobār meñ huuñ bhī nahīñ bhī huuñ

jo qīmat jānte haiñ gard-e-rāh-e-zindagānī kī
vo Thukrā.ī huī duniyā ko Thukrāyā nahīñ karte

koī to chāhiye hadd-e-ḳhsuh-famī-e-fareb
duniyā tū merī aañkh meñ jhoñkegī kitnī ḳhaak

kār-e-duniyā ne hameñ mohlat-e-yak-ḳhvāb na dī
so kahīñ kho.e hue haiñ na hī paa.e hue haiñ

bū-e-riyā har ek gul-e-boriyā meñ hai
duniyā kī ghar kā farsh hai zāhid kī jā-namāz

kareñge zulm duniyā par ye but aur āsmāñ kab tak
rahegā piir ye kab tak rahoge tum javāñ kab tak

ḳhudāvandā inheñ kis din shu.ūr aa.egā duniyā kā
raheñgī be-paḌhī-likhī hamārī laḌkiyāñ kab tak

tābish-e-husn bhī thī ātish-e-duniyā bhī magar
sho.ala jis ne mujhe phūñkā mire andar se uThā

chāhiye kuchh sukūn duniyā meñ
ḳhvāhisheñ apnī muḳhtasar kar leñ

chal diyā vo sab ko tanhā chhoḌ kar
kaash vo duniyā meñ rahtā der tak

kaam aate na the ham ko bas ik kār-e-junūñ ke
duniyā kī nigāhoñ meñ to bekār the ham log

soch ke aayā thā duniyā meñ sab apne hoñge
apnā saaya bhī parāyā hai chalā jā.egā

samundar to mathe jaatī hai duniyā
koī bhī vish magar piitā nahīñ hai

yuuñ hī be-ma.anī be-mauqa
nāchne lagtī hai duniyā dil giit sunātā hai