Tags-Duniya

duniyā kamā ke so ga.e jo be-charāġh log
un ko mirā ḳhayāl hai qabreñ dikhā.iye

mire vajūd kī duniyā meñ hai asar kis kā
maiñ jāntā hī nahīñ huuñ maiñ ham-safar kis kā

ab to aur bhī duniyā.eñ haiñ muntazir-e-arbāb-e-havas
un logoñ kā qaul nahīñ hai ham ko ye duniyā kaafī hai

kyuuñ ishq ke jhagḌe ko le jaatā hai uqbā meñ
kar ḳhātma duniyā meñ duniyā kī musībat kā

dil kī duniyā hasratoñ ke dam se hī ābād hai
gaahe gaahe ham ko apnī hasrateñ achchhī lagīñ

mirī ġham-ḳhvār ye duniyā na ho to ġham nahīñ 'sāhil'
mirī fitrat meñ shāmil hai ye ġham-ḳhvārī nahīñ jaatī

samajhtī hai shaam o sahar jis ko duniyā
tire zulf o aariz kī ḳhairāt hogī

duniyā vo rāste kī rukāvaT hai dosto
jis se hameñ shadīd lagāvaT hai dosto

maiñ kis tezī se zinda huuñ maiñ ye to bhuul jaatā huuñ
nahīñ aanā hai duniyā meñ dobāra yaad rahtā hai

ye duniyā kyā ḳhabar ab ke bachegī
maiñ apnā marsiya ḳhud likh rahā huuñ

duniyā se guzarnā hī ajab kuchh hai ki jis meñ
koī na kabhū rok sake raah kisū kī

ye haqā.eq kī chaTānoñ se tarāshī duniyā
oḌh letī hai tilismoñ kī ridā raat ga.e

yaar duniyā ke sāñche meñ Dhalte rahe sham.a fānūs the ham pighalte rahe
apnī tanhā-ravī apnā soz-e-darūñ ham bhī duniyā meñ ik mājrā ho ga.e

marīz-e-ishq kī juz-marg duniyā meñ davā kyuuñ ho
agar jaañ ho aziiz apnī to jānāñ par fidā kyuuñ ho

yāroñ ke yārāne dekhe
duniyā ke farzāne dekhe

duniyā gunāhgār hai terī nigāh meñ
zāhid hai terā zo.am bhī dāḳhil gunāh meñ

dīvāngān-e-ishq ko duniyā kī kyā ḳhabar
duniyā ko chhoḌ aa.e kahīñ gard-e-rāh meñ

harf-e-be-saut kī mānind rahe duniyā meñ
dasht-e-imkāñ meñ khule naqsh-e-musavvir na hue

duniyā merī zindagī ke din kam kartī jaatī hai kyuuñ
ḳhuun pasīna ek kiyā hai ye merī mazdūrī hai

apne baad hī duniyā meñ Thahrāo jo aa.e to aa.e
jab tak ham zinda haiñ tab tak har ik daur ubūrī hai