Tags-Duniya

'talḳh' hamāre hosh ke aalam kā hai rañg-e-suḳhan kuchh aur
jis par vajd meñ hai ik duniyā vo to ġhair-shu.ūrī hai

ye duniyā hai yahāñ har ābgīna TuuT jaatā hai
kahīñ chhupte phiro āḳhir zamāna DhūñDh hī legā

jo raaz thā mirī āvārgī pe ifshā thā
tilism ban ga.ī duniyā mire qayām ke ba.ad

sair-e-duniyā se jo lauTe to ye jaanā ham ne
shahr-e-'ġhālib' tire ḳhūbāñ-e-nazar achchhe the

sunī thī vus.at-e-duniyā kī dāstāñ ham ne
magar milī na jagah āshiyāñ banāne kī

ye kah ke palTe haiñ duniyā ke dekhne vaale
ki ye jagah nahīñ vallāh dil lagāne kī

vo jab se multafit mujh se hue haiñ
ye duniyā ḳhūbsūrat ho ga.ī hai

haqīqat ye hai ham kyā uTh ga.e haiñ
vafā duniyā se ruḳhsat ho ga.ī hai

ek ehsān hai qudrat kī jafā-kārī par
us kī duniyā meñ bhī jiine kī tamannā karnā

saarī duniyā dushman-e-jāñ ban ga.ī hai ai 'sirāj'
koī patthar bhī na aayā tere shaidā kī taraf

ruḳh-e-jānāñ ke tasavvur hī meñ rāteñ guzrīñ
chāñd-tāre dil-e-mahjūr kī duniyā na bane

ye duniyā dā.imī ghar hai nahīñ hai
phir is ke ba.ad mahshar hai nahīñ hai

aa mere jahāñ meñ mirī duniyā kī tamannā
ab merī murādoñ kā jahāñ zer-o-zabar hai

majbūr-e-ġham-e-duniyā dil se to koī pūchhe
ehsās kī rag meñ hai ḳhār-e-ġham-e-jānāñ bhī

qaid-e-hastī meñ huuñ apne farz kī ta.amīl tak
ik na.ī duniyā na.e insān kī tashkīl tak

na jaane kyuuñ ye duniyā chain se jiine nahīñ detī
koī pūchhe ham is par kaun sī be-dād karte haiñ

nāvak-andāzī-e-jānāñ kā asar hai ki 'figār'
ek duniyā mirī hamnām huī jaatī hai

farhat-ehsās se aatī thī sadā-e-girya
āḳhir-kār vo duniyā kā azā-ḳhāna banā

ġham-e-daurāñ ġham-e-jānāñ ġham-e-uqbā ġham-e-duniyā
'kañval' is zindagī meñ ġham ke māroñ ko na chain aayā

aap duniyā ko mohabbat kī davā bechte haiñ
aap ke paas ilāj-e-ġham-e-jāñ bhī hogā