Tags-Duniya

thiiñ ye duniyā kī bāteñ duniyā tak
hashr meñ kyā gilā kare koī

har taraf tārīk thī duniyā magar
ik charāġh-e-dil thā jo bujhtā na thā

bandisheñ ishq meñ duniyā se nirālī dekheñ
dil taḌap jaa.e magar lab na hilā.e koī

aaj duniyā ko nahīñ apne ġhamoñ se fursat
aaj mil baiThnā āsāñ hai qarīb aa jaao

uḌte tayyāre kī khiḌkī se zarā sā jhāñk le
itne hañgāmoñ-bharī duniyā bhī tanhā.ī meñ hai

ye duniyā akbar zulmoñ kī ham majbūrī kī anārkalī
ham dīvāroñ ke biich meñ haiñ ham narġha-e-jabr-o-jalāl meñ haiñ

merī aahaT guuñj rahī hai
duniyā kī har rāhguzar meñ

nahīñ chhoḌtī hai mujh ko kisī moḌ par ye duniyā
maiñ ise rulā rahā huuñ ye mujhe rulā rahī hai

ye mahloñ ye taḳhtoñ ye tājoñ kī duniyā
ye insāñ ke dushman samājoñ kī duniyā

ye duniyā jahāñ aadmī kuchh nahīñ hai
vafā kuchh nahīñ dostī kuchh nahīñ hai

jalā do ise phūñk Daalo ye duniyā
mire sāmne se haTā lo ye duniyā

vaise bhī us se koī rabt na rakkhā maiñ ne
yuuñ bhī duniyā meñ kashish terī ba-nisbat kam thī

ham bhī 'munīr' ab duniyā-dārī kar ke vaqt guzāreñge
hote hote jiine ke bhī laakh bahāne aa jaate haiñ

kyā kahiye dāstān-e-tamannā badal ga.ī
un kī badalte hī duniyā badal ga.ī

vo ḳhvāb-e-zindagī thā jo ham dekhte rahe
ai 'dil' khulī jab aañkh to duniyā badal ga.ī

ye chaar din ke tamāshe haiñ aah duniyā ke
rahā jahāñ meñ sikandar na aur na jam baaqī

yahāñ har jeb meñ ḳhvāboñ kī zar-muhreñ khanaktī haiñ
ye duniyā dard kā bāzār hai aisā nahīñ lagtā

barsoñ se ho rahā hai barham samāñ hamārā
duniyā se miT rahā hai nām-o-nishāñ hamārā

tū ne har aan badaltī huī is duniyā meñ
merī pā.indagi-e-ġham ko to dekhā hotā

mire pahlū meñ hai ābād armānoñ kī ek duniyā
hazāroñ mayyateñ uTheñgī mire saath bistar se