Tags-Dushman

ab to 'shā.ir' zamāna hai dushman
rāhzan kyā hai rahnumā kyā hai

thā sail-e-hasrat-e-dil dushman-e-hayāt magar
rah-e-baqā bhī usī meñ thī haT ke dekhte kyā

chain kā dushman huā ik mas.ala merī taraf
us ne kal dekhā thā kyuuñ aur aaj kyuuñ dekhā nahīñ

kyuuñ haram meñ ye ḳhayāl aatā hai
ab kisī dushman-e-dīñ se miliye

shohrateñ, jin kī vaj.h se dost dushman ho ga.e
sab yahīñ rah jā.eñgī maiñ saath kyā le jā.ūñgā

aa gayā phir mashvara dene mujhe
ḳhema-e-dushman kā samjhāyā huā

dekhte hī dekhte aapas meñ dushman ho ga.e
ḳhuun kā dariyā ravāñ hai bhā.iyoñ ke darmiyāñ

hairān huuñ kis tarah karūñ arz-e-tamannā
dushman ko to pahlū se vo Talne nahīñ dete

mujhe jo bhī dushman-e-jāñ milā vahī puḳhta-kār-e-jafā milā
na kisī kī zarb ġhalat paḌī na kisī kā tiir ḳhatā huā

mohabbat dil meñ dushman kī bhī apnā rañg laatī hai
vo kitne be-muravvat hoñ muravvat aa hī jaatī hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

mirī ḳhandaq meñ us ke qurb kī qindīl raushan hai
mire dushman se kah denā maiñ us se pyaar kartā huuñ

vaqt kyā aa gayā hai sad-afsos
bhaa.ī dushman huā hai bhaa.ī kā

sarfaroshī kā maza hai na ḳhatā-poshī kā
dushman-e-jān bhī jazbāt se ab aarī hai

itnā bhī kisī dost kā dushman na ho koī
taklīf hai un ke liye ārām hamārā

zamāna bhī mujh se nā-muvāfiq maiñ aap bhī dushman-e-salāmat
ta.ajjub is kā hai bojh kyūñkar maiñ zindagī kā uThā rahā huuñ

thā dushman-e-jāñ baġhal meñ 'hātim'
jaane de balā se gar gayā dil

ab kahāñ jā.ūñ ki ghar meñ bhī huuñ dushman apnā
aur bāhar mirā dushman hai nigahbānī ko

soch rahā huuñ apnī hastī meñ apnā kyā hissa thā
dil par yāroñ kā haq Thahrā aur dushman ne sar māñgā

kal talak jo mirī tārīf kiyā kartā thā
aaj vo bhī mirā dushman hai ye qissa kyā hai