Tags-Dushman

tūfān kā nadīm tabāhī kā yaar huuñ
bāġhī huuñ aur dushman-e-sabr-o-qarār huuñ

sab ke chehroñ pe koī chehra hai
koī dushman hai koī apnā hai

kyūñkar maiñ is ko dushman-e-hastī qarār duuñ
paatā huuñ mudda.ā kā zarīya qazā ko maiñ

bahut ḳhāmosh thā dushman magar bolā to ye bolā
are kyā baat hai nirmal-'nadīm' achchhī ġhazal kah dī

ḳhumār āñkhoñ meñ baaqī hai abhī tak bazm-e-dushman kā
tasadduq us DhiTā.ī ke nazar ham se milāte haiñ

dushman hai musāfir to use saaf batā do
dīvār huuñ maiñ sāya-e-dīvār nahīñ huuñ

ġham hī jī kā dushman thā ġham se duur rahte the
ġham hī rah gayā āḳhir ek ġham-gusār apnā

hai kaun mirā dushman-e-jāñ mujh ko ḳhabar hai
kab maiñ ne kahā mujh ko sitamgar kā patā de

phir bhī hai vaj.h-e-qarār-e-dil-e-muztar 'hāfiz'
vo adū diin kā dushman mirī jaañ kā hī sahī

dostī kar ke 'qalaq' un se bahut pachhtātā
dushman-e-jāñ mire ḳhūbān-e-jafā-kār haiñ sab

hijr kī rātoñ meñ bhī tanhā kahāñ rahtā hai zehn
tum kabhī aa jaao ho, dushman kabhī aa jaa.e hai

zikr kiyā maiñ aap kā kis se kis ke aage naam liyā
dushman the vo log mire jo aap ke ta.iiñ bahkāte the

haath phailā.ūñ to kis kī samt apnā ruḳh karūñ
āsmāñ dushman zamīñ bandoñ se uktā.ī huī

apne dushman hazār nikle haiñ
haañ magar bā-vaqār nikle haiñ

shikāyat se ġharaz kyā mudda.ā kyā
nahīñ to dost dushman kā gilā kyā

'shād' dushman kī shikāyat kā vazīfa be-kār
kyā ġharaz thī ki mire saath bhalā.ī kartā

har chiiz nahīñ hai markaz par ik zarra idhar ik zarra udhar
nafrat se na dekho dushman ko shāyad vo mohabbat kar baiThe

na āsmāñ se na dushman ke zor o zar se huā
ye mojaza to mire dast-e-be-hunar se huā

ab to apnoñ pe bharosa na rahā
dost dushman ke qarīb aa pahuñche

'ājiz' ye qaul apne buzurgoñ kā yaad rakh
rasta kabhī na chhoḌnā dushman ke Dar se dekh