Tags-Dushman

vo muravvat se milā hai to jhukā duuñ gardan
mere dushman kā koī vaar na ḳhālī jaa.e

ye kaafī hai ki ham dushman nahīñ haiñ
vafā-dārī kā da.avā kyuuñ kareñ ham

tīr-e-qātil ko kaleje se lagā rakkhā hai
ham to dushman ko bhī ārām diye jaate haiñ

us kī vafādārī mashkūk Thahar jaatī hai
kār-e-vafā meñ dushman jis kā koī nahīñ hai

ab dushman-e-jāñ hī kulfat-e-ġham saaqī
fariyād laboñ par aa gayā dam saaqī

hotī haiñ har tarah se mirī pāsdāriyāñ
dushman ke paas bhī vo mirā yaar hī rahā

ye daur kaisā hai yā-ilāhī ki dost dushman se kam nahīñ hai
ḳhulūs-e-har-rahbar-e-zamāna fareb-e-rahzan se kam nahīñ hai

shādāñ huuñ ki ġhamnāk piye jaatā huuñ
huuñ dushman-e-aflāk piye jaatā huuñ

faujiyoñ ke sar to dushman ke sipāhī le ga.e
haath jo qīmat lagī zill-e-ilāhī le ga.e

sāqī-ba-jalva dushman-e-īmān-o-āgahī
mutrib ba-naġhma rahzan-e-tamkīn-o-hosh hai

zikr-e-dushman hai nāgavār kise
tum sunāte ho baar baar kise

apne begāne hue aur zamāna dushman
be-dimāġhī ne mirī din ye dikhāyā hai mujhe

jab vaqt bigaḌtā hai hotā hai jahāñ dushman
jab baat bigaḌtī hai tadbīr nahīñ bantī

mere dushman kī sharāfat dekhiye
daar kartā hai mujhe pahchān kar

dost dushman ko banānā koī tum se sīkhe
dostī kaisī nibāheñ koī ham se pūchhe

'mujībī' kam nahīñ 'fikrī' kī dostī kī panāh
agarche dushman-e-jāñ be-hisāb chāroñ taraf

nafs-e-ammāra sā rakhtā hai ye sarkash dushman
aadmī ke liye ġhāfil nahīñ rahnā behtar

us dushman-e-vafā ko duā de rahā huuñ maiñ
merā na ho sakā vo kisī kā to ho gayā

zāhir na sahī dar-parda sahī dushman bhī hifāzat karte haiñ
kāñTe hoñ nigahbāñ jis gul ke us gul kā masalnā mushkil hai

kuchh to ta.alluq kuchh to lagāo
mere dushman hī kahlāo