Tags-Dushman

vahī bane dushman-e-tamannā jinheñ sikhāyā thā ham ne jiinā
agar ye pūchheñ to kis se pūchheñ ki dostī kā shi.ār kyā hai

ye jahāñ hai ik tamāsha koī dost hai na dushman
vahī aag raushnī de vahī āshiyāñ jalā de

tujh se maiñ jañg kā elaan bhī kar hī dūñgā
mere dushman tū mire qad ke barābar to aa

koī āsūda nahīñ ahl-e-siyāsat ke sivā
ye sadī dushman-e-arbāb-e-hunar lagtī hai

na kar paa.e dushman bhī jo dushmanī meñ
kiyā hai rafīqoñ ne vo dostī meñ

na kyūñkar rashk-e-dushman se ḳhalish ho ḳhār-e-hasrat kī
ye vo kāñTā hai jis se paañv meñ kyā dil meñ chhāle haiñ

yāroñ kī fihrist bane to ḳhālī satreñ bhī rakh lenā
'manzar' dushman ko bhī ik din yaar banānā paḌ jaatā hai

ulmā haiñ dushman-e-fahm-o-tahaqīq
kodanī sheva-e-dānish-mandāñ

baat ye hai ki sabhī bhaa.ī mire dushman haiñ
mas.ala ye hai ki maiñ yūsuf-e-sānī bhī nahīñ

rasm ulTī hai ḳhūb-rūyoñ kī
dost jis ke bano vo dushman hai

jaatī huī mayyat dekh ke bhī vallāh tum uTh kar aa na sake
do chaar qadam to dushman bhī taklīf gavārā karte haiñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

koī dushman ko yuuñ na dekhegā
jaise qismat ko dekhtā huuñ maiñ

ye dil to dushman-e-jānī hai ek muddat se
jo ġham-navāz ho aisā ġham-āshnā de do

kuchh na kuchh ho hī rahegā dard-mandī kā ma.aal
jaan ke dushman tujhī ko ham pukāre jā.eñge

le jā.ūñ ab maiñ yaañ se kahāñ apnā āshiyāñ
dushman hai is chaman meñ mirā ḳhaar ḳhaar tak

Dar na dushman kuuñ kaḌkaḌāne meñ
baañg murġhī ke yaañ nahīñ hai durust

maslahat hai jin kā maslak vo mire bhaa.ī kahāñ
jo na uTTheñ mere dushman par mire baazū nahīñ

vo ab bhī dil dukhā detā hai merā
vo merā dost hai dushman nahīñ hai