Tags-Dushman

kuchh to miltā mujhe dushnām-tarāzī hī sahī
ḳhuub hotā jo maiñ dushman ke barābar hotā

aaj tak jo bhī huā us ko bhulā denā hai
aaj se tai hai ki dushman ko duā denā hai

tirī ye dushman-e-jāñ ko duā jabīn-e-niyāz
ki tū rahe ye terā sañg-e-āstāñ bhī rahe

mere dushman na mujh ko bhuul sake
varna rakhtā hai kaun kis ko yaad

sañg-e-dar se tire nikālī aag
ham ne dushman kā ghar jalāne ko

har dushman-e-vafā mujhe mahbūb ho gayā
jo mo.ajaza huā vo bahut ḳhuub ho gayā

sab milte-julte chehre haiñ dushman bhī dost bhī
qātil kise batā.eñ masīhā kise kaheñ

naam se mere nagar meñ ik mohalla dekh kar
merā dushman mar na jaa.e mujh ko zinda dekh kar

jo kare yaad dushmanī meñ bhī
aise dushman ko pyaar kartā huuñ

merā dushman hai dūsrā har shaḳhs
aur vo dūsrā to maiñ bhī huuñ

zamāna bhī mujh se nā-muvāfiq maiñ aap bhī dushman-e-salāmat
ta.ajjub is kā hai bojh kyūñkar maiñ zindagī kā uThā rahā huuñ

vaar kuchh ḳhālī ga.e mere to phir aa hī ga.ī
apne dushman ko duā dene kī hushyārī bhī

kuchh aisī to dushman meñ ḳhūbī nahīñ hai
magar tū ḳhudā jaane kyā jāntā hai

piiTh pīchhe se agar vaar na kartā 'sāhir'
apne dushman ke janāze ko maiñ kandhā detā

ġham-e-pinhāñ nazar aatā hai mujhe dushman-e-jāñ
haa.e ye dard ki jis kā koī darmāñ bhī nahīñ

kaf-e-momin se na darvāza-e-daurāñ se milā
rishta-e-dard usī dushman-e-īmāñ se milā

dil dushman-e-jāñ hai to ḳhirad qātil-e-īmāñ
ye kaisī balāoñ ko mujhe sauñp diyā hai

hai dushman man-chalā par 'azfarī' dekh
nazar paḌte sañkaḌ jaatā hai mujh se

merā dushman kaf-e-afsos malegā jānāñ
ḳhud ko is tarah se barbād karūñgā ik din

ma.alūm ye hotā hai ab tak yūsuf ke barādar zinda haiñ
jab apne dushman ho jaa.eñ ġhairoñ kī shikāyat kaun kare