Tags-Dushman

ai dost tujh ko rahm na aa.e to kyā karūñ
dushman bhī mere haal pe ab āb-dīda hai

duniyā meñ ham rahe to ka.ī din pa is tarah
dushman ke ghar meñ jaise koī mehmāñ rahe

'muntazir' shakl-e-bulbul-e-vahshī
Dushman-e-āshiyana haiñ ham log

āsmāñ laakh baar dushman ho
kyā ho barbād mere ghar hī nahīñ

jazb-o-asar se ban gayā aur bhī dushman āsmāñ
kar diyā rāz-e-dil ayaañ āh-e-rasā ko kyā huā

tire shauq meñ dil kī tabāhī huī tire zauq kī us pe gavāhī huī
koī dam bhī na lene diyā mujhe dam mujhe dushman-e-sabr-o-qarār kiyā

mere dushman tere dost
donoñ ke ahbāb judā

shadīd vaar na dushman diler thā 'mohsin'
maiñ apnī be-ḳhabarī se magar halāk huā

kitnā pyārā hai vo 'nūrī' mirā vaqtī dushman
merī be-rāh-ravī par jo ḳhafā hotā hai

ḳhud hī 'ejāz' apnā dushman huuñ
sirf ahbāb ho gayā huuñ maiñ

haiñ tere ruḳh pe vo taqdīs ke partav ki tujhe
zeb detā hī nahīñ dushman-e-īmāñ honā

raazī haiñ ham ki dost se ho dushmanī magar
dushman ko ham se dost banāyā na jā.egā

dil meñ kab tak tumhāre khaTkūñgā
chashm-e-dushman meñ merī jā kab tak

mujh ko tark-e-dostī ke is qadar ta.ane na de
maiñ tirā dushman nazar aane lagūñ aisā na ho

vo ulfat dost hoñ nāseh duā hī dil se niklī hai
agar dushman ke ghar bhī majma-e-ahbāb dekhā hai

apnā dushman hī dikhā.ī nahīñ detā ho jise
aisā lashkar to saf-ārā bhī nahīñ ho saktā

qatl na hogā tum se merā maiñ apnā hī dushman huuñ
aag lagā do bandūqoñ meñ pheñko tīr-kamānoñ ko

kyā zamāne kā gilā 'sāqib' kisī kā kyā qusūr
ye dil-e-ġham-dost ḳhud hī dushman-e-ārām thā

ham to vo the ki mohabbat thā vatīra jin kā
pyaar se miltā to dushman ke bhī ho jaate the

sipāh-e-dushman-e-insāniyat qarīb aa.ī
dayār-e-husn sar-e-rahguzar kī ḳhair manāo