Tags-Dushman

jab hue 'hātim' ham us se āshnā
dost bhī dushman hamāre ho ga.e

āñkhoñ se yuuñ ishāra-e-dushman na dekhte
hote na is qadar jo nigahbāniyoñ meñ ham

vo falsafe jo har ik āstāñ ke dushman the
amal meñ aa.e to ḳhud vaqf-e-āstāñ nikle

vo ik shaḳhs jo dushman-e-jāñ sahī
magar phir bhī apnā kahā jā.egā

'nazīr' vo but hai dushman-e-jāñ na miliyo us se tū dekh hargiz
vagar milā to ḳhudā hai hāfiz bache haiñ ham bhī ḳhudā ḳhudā kar

rivāyat chhoḌ baiThā huuñ maiñ apnī
maiñ dushman apne ghar kā ho gayā huuñ

jabki dushman ho raaz daañ apnā
raaz kyuuñ kar rahe nihāñ apnā

har dushman-e-jāñ ahl-e-vafā hai
ik bā-vafā tum ik bā-vafā dil

dekh ke mujh ko hañs detā hai
dushman bhī kyā ḳhuub milā hai

dushman na yuuñ ho dost ne jis tarah se hameñ
bā-hālat-e-tabāh ġharīb-ul-vatan kiyā

allāh allāh ye fazā-e-dushman-e-mehr-o-vafā
āshnā ke naam se hotā hai barham āshnā

kaun aisā hai jo mujh bekas kī dildārī kare
darpa-e-jāñ dost dushman apnā begāna huā

maut hī insān kī dushman nahīñ
zindagī bhī jaan le kar jā.egī

sar-phirī tund havā ham bhī nahīñ tum bhī nahīñ
mulk-dushman ba-ḳhudā ham bhī nahīñ tum bhī nahīñ

baste jaate haiñ nagar dil haiñ tabāh o vīrāñ
āgahī dushman-e-duniyā-e-sukūñ hai ki nahīñ

kis dushman-e-jāñ kī aarzū hai
jo maut ke ḳhvāst-gār haiñ ham

dushman ga.e to kashmakash-e-dostī ga.ī
dushman ga.e ki dost hamāre chale ga.e

dost haiñ saare zamāne vaale
maiñ ne dushman se banā.ī huī hai

guzre na 'jalīl' aise hālāt se dushman bhī
jaane hue sāthī bhī anjāne nazar aa.e

ajal kā naam dushman dūsre ma.anī meñ letā hai
tumhāre chāhne vaale tamannā is ko kahte haiñ