Tags-Dushman

dushman-e-dil dushman-e-dīñ dhushman-e-hosh-o-havās
haa.e kis nā-mehrbāñ ko mehrbāñ samjhā thā maiñ

jaan jaatī hai to jaa.e magar ai dushman-e-jāñ
ham kabhī tujh pe koī vaar nahīñ kar sakte

jaatī huī mayyat dekh ke bhī vallāh tum uTh ke aa na sake
do chaar qadam to dushman bhī taklīf gavārā karte haiñ

aañkh meñ dahshat na thī haath meñ ḳhanjar na thā
sāmne dushman thā par dil meñ koī Dar na thā

dost un kā jo hai barbād to dushman hai ḳharāb
lutf achchhā na hasīnoñ kī adāvat achchhī

kareñ bhī kyā shikva-e-zamāna kaheñ bhī kyā dard kā fasāna
jahāñ meñ haiñ laakh dushman-e-jāñ koī masīhā-nafas nahīñ hai

dekh lī dekh lī bas ham ne tabī.at terī
ho na dushman ke bhī dushman ko mohabbat terī

kyā ġharaz us se ho dushman pe ināyat terī
ham to jiite haiñ faqat dekh ke sūrat terī

hamārā imtihāñ aur kū-e-dushman
kisī ne be-Thikāne maar Daalā

murda bastī hai ḳhabar kaun kisī kī legā
saath meñ dushman-o-dushnām liye phirte haiñ

jatā ke majbūrī-e-mohabbat umīd-e-mehr-o-vafā ke ma.anī
maiñ ḳhud huuñ apnā sukūn-e-dushman kisī kī koī ḳhatā nahīñ hai

aur ma.ashūq se milne kī tamannā kyuuñ ho
aap kyā kam haiñ mirī jaan ke dushman mujh ko

ahbāb kī bāñhoñ kā nasha aur hai lekin
tū ne kabhī dushman se lipaT kar nahīñ dekhā

dushman-e-jāñ the udhar hijr meñ dard-o-ġham-o-rañj
aur idhar ek akelā tirā shaidā.ī thā

vatan dushman inheñ kyuuñ kar na samjheñ
jinheñ hai dushmanī urdu zabāñ se

mahv kar dī zehn se ġham ne tirī tasvīr bhī
donoñ dushman haiñ mirī taqdīr bhī tadbīr bhī

ye manzilat bhī hissa-e-dushman meñ aa.e kyuuñ
ham sar na phoḌ leñ jo tirā āstāñ mile

hārne kā hausla to thā nahīñ
jiit meñ dushman kī hissa kar liyā