Tags-Dushman

dushman mirī shikast pe muñh khol kar hañse
aur dost apne jism ke andar uchhal paḌe

ishq kī chiñgāriyoñ ko phir havā dene lage
mere paas aa kar vo dushman ko duā dene lage

apne jaisā koī dushman bhī zarūrī hai bahut
tere jaise bhī ka.ī yaar banāne haiñ mujhe

raaj karte haiñ vahī log diloñ par 'ḳhālid'
baḳhsh dete haiñ jo dushman ko sikandar kī tarah

'ḳhār' dushman ne to ilzām tarāshe kyā kyā
surḳh-rū mujh ko magar merī vafā ne rakkhā

kisī sūrat to dil ko shaad karnā
hameñ dushman samajh kar yaad karnā

dushman se to kyā haq-e-adāvat kā gilā jab
yāroñ ke liye yār-kushī ek hunar hai

samjhā.eñ kis tarah dil-e-nā-kardā-kār ko
ye dostī samajhtā hai dushman ke pyaar ko

zulf o chashm o ḳhaal o ḳhat chāroñ haiñ dushman diin ke
haq rakkhe īmāñ salāmat aise kufristāñ ke biich

rashk-e-dushman kī talāfī ko ye pahlū nahīñ kam
ġham-e-jāñ-kāh-e-mohabbat ke vo qātil to hue

na koī dushman na dost apnā na nek-o-bad se hameñ ta.alluq
jo chashm-e-vahdat se ham ne dekhā na kuchh burā hai na kuchh bhalā hai

hazār shukr salāmat hai merā sar ab bhī
hazār dushman-e-jāñ se bhī dostāna huā

is tarīqe ko adāvat meñ ravā rakhtā huuñ maiñ
apne dushman ke liye harf-e-duā rakhtā huuñ maiñ

aa to jā.eñge vo merī āh-e-pur-tāsīr se
mahfil-e-dushman meñ rusvā.ī magar ho jā.egī

milā un ko na dushman man mutābiq
jo pīchhe rah ga.e the koshishoñ meñ

qabr kā tālib abas hai jism-e-zār
chashm-e-dushman meñ samā jaatā nahīñ

dushmanī ne merī khoyā ġhair ko
kis qadar dushman hai dekhā chāhiye

is liye shaad rahtā huuñ har haal meñ
mere dushman ko merī ḳhushī maut hai

chheḌā jo mire aage phir tazkira-e-dushman
rakkhī huī hai mujh se takrār samajh lenā

is andhere meñ chhupānā hai koī dushman magar
is ujāle meñ kisī par vaar karnā hai mujhe