Tags-Dushman

mile ġhairoñ se mujh ko ranj o ġham yuuñ bhī hai aur yuuñ bhī
vafā-dushman jafā-jū kā sitam yuuñ bhī hai aur yuuñ bhī

daroġh-bāfī-e-dushman kā haal kyā khultā
jo parda chaak bhī hotā to vo rafū karte

jalte haiñ jahāñ vaale lo jaleñ ham rāh-e-vafā meñ saath chaleñ
duniyā ko chhoḌo duniyā to dil vāloñ kī dushman hotī hai

sar-e-dushman na toḌiye kab tak
mujh pe chaltā hai vo hamesha joḌ

samajh rahā thā jise ḳhair-ḳhvāh maiñ apnā
vahī hai dushman-e-jāñ merā sab se baḌh kar aaj

ahbāb kī ye shān-e-harīfāna salāmat
dushman ko bhī yuuñ zahr ugalte nahīñ dekhā

jo sañg-e-ehtisāb yagānoñ ke paas haiñ
dushman ke haath meñ bhī vo patthar kabhī na the

maiñ na kahtā thā ki bahkā.enge tum ko dushman
tum ne kis vāste aanā mire ghar chhoḌ diyā

jo merī jaan ke dushman the un par jaan dī maiñ ne
sikhā.ī yuuñ bhī apne dushmanoñ ko dostī maiñ ne

ye jo dushman ġham-e-nihānī hai
ye bhī ik dost apnā jaanī hai

maut jis ko lage hai dushman sī
har ghaḌī Dar ke vo jiyā hogā

aaj mere hī dil ne ai 'ābid'
apnā dushman banā diyā hai mujhe

ye shohrateñ na.e dushman bahut banātī haiñ
sambhal ke rahnā tumhārī havā ziyāda hai

vaqt ne chaal kaisī chalī ai 'hasan'
dost jaise ko dushman-numā kar diyā

khul nahīñ saktī kabhī kaifiyyat-e-buġhz-o-hasad
merī aaheñ parda-e-nāmūs-e-dushman ho ga.iiñ

yaar garm-e-mehrbānī ho gayā
dushman-e-jānī thā jaanī ho gayā

shikva dushman kā karte Dartā huuñ
ho vahī mār-e-āstīñ na kahīñ

dost aur dushman ke chehre tā-ba-kai vāzeh na hoñ
diip kī lau itnī maddham dekhiye kab tak rahe

panāh-gāh mujhe bhī to saur jaisī de
mirī talāsh meñ dushman haiñ tāza-dam mere

dushman se pūchhtā huuñ nishān-e-harīm-e-nāz
merī tarah se koī na gum-karda-rāh ho