Tags-Dushman

khaḌe hoñ dost ki dushman safeñ sab ek sī haiñ
vo jāntā hai idhar se nahīñ guzarne kā

in se zinda hai ye ehsās ki zinda huuñ maiñ
shahr meñ kuchh mire dushman haiñ bahut achchhā hai

kal ġhair ke dhoke meñ vo iid mile ham se
kholī bhī to dushman ne taqdīr-e-ham-āġhoshī

har ik science kā chhīkā gaḌant hai
baḌā dushman mire jī kā gaḌant hai

lamha lamha apnī zahrīlī bātoñ se Dastā thā
vo merā dushman ho kar bhī mere ghar meñ bastā thā

duur duur tak koī nahīñ ab tujhe bachā le jo aa kar
daad to de dushman ko 'pāshī'! kiyā hai us ne vaar kahāñ

gherā Daale hue hai dushman bachne ke āsār kahāñ
ḳhālī haath khaḌe ho 'pāshī' rakh aa.e talvār kahāñ

bujhte bujhte bhī añdheroñ kī rahe jo dushman
aisī hastī ko charāġh-e-saharī kyuuñ kahiye

falak dushman muḳhālif gardish-e-ayyām hai saaqī
magar ham haiñ tirī mahfil hai daur-e-jām hai saaqī

judā kisī se kisī kā ġharaz habīb na ho
ye daaġh vo hai ki dushman ko bhī nasīb na ho

mar-miTe jab se ham us dushman-e-dīñ par sāhab
paañv Tikte hī nahīñ apne zamīñ par sāhab

jitne bhī dil-rīsh haiñ us ke sab ko naame bhej bulā
us be-mehr vafā dushman kī yādoñ kā darbār kareñ

ham zamāne meñ mohabbat ke bhikārī Thahre
dost haiñ sab ke magar dushman-e-jāñ haiñ apne

jaltā huuñ bachāte haiñ use soz-e-darūñ se
dushman ko mirī aag meñ jalne nahīñ dete

dushman kī taraf ho ke nikalne nahīñ dete
ham ko vo burī raah bhī chalne nahīñ dete

laḌā kar aañkh us se ham ne dushman kar liyā apnā
nigah ko naaz ko andāz ko abrū ko mizhgāñ ko

haañ rasm-e-mudārāt-e-junūñ aur baḌhegī
haañ dushman-e-dil āfat-e-jāñ aur bhī hoñge

kuchh to the dost bhī vafā-dushman
kuchh mirī aañkh meñ hayā bhī thī

dushman-e-īmāñ pesh-e-nazar
andar halchal bāhar chup

jise bhī dost banāyā vo ban gayā dushman
ye ham ne kaun sī taqsīr kī sazā paa.ī