Tags-Aansoo

ro denā bhī majbūrī to hai lekin
lutf alag hai dil meñ aañsū bone kā

paayā jab se zaḳhm kisī ko khone kā
sīkhā fan ham ne be-āñsū rone kā

maiñ ek chor churātā huuñ qīmtī zevar
tumhārī aañkh se aañsū churā liyā jaa.e

jaane kab se chamak rahe haiñ
peḌ kī har ik shāḳh pe aañsū

tumhāre sāmne aañsū bhī tham tham kar nikalte haiñ
maiñ Dartā huuñ kahīñ ye dāstāñ baaqī na rah jaa.e

phir din tirī yādoñ kī muñDeroñ pe guzārā
phir shaam huī aañkh meñ aañsū nikal aa.e

ġham Tapak paḌtā hai kyuuñ aañkh se aañsū ban kar
jab tirī yaad satā.e shab-e-hijrāñ meñ mujhe

mirī mohabbat kī dāstāñ sun ke ro paḌe 'josh-malsiyānī'
sukhā ke pañkhe se un ke aañsū abhī vahāñ se maiñ aa rahā huuñ

agar ho tum 'hājara' to phir mujh se mil ke 'masrūr' kyuuñ nahīñ ho
tumhāre aage 'opendr-nāth-ashk' ban ke aañsū bahā rahā huuñ

be-āvāz the aañsū is ke
chhoTe chhoTe pair the us ke

aañsū bahe to yuuñ huā bīnā.ī baḌh ga.ī
phir saaf saaf dikh gayā kyā kyā ḳharāb hai

aañsū bhar aa.e dil bhar aayā
gar naam bhī sun liyā ḳhushī kā

ye aañsū toḌ degā sab hisār-e-jism-o-jāñ ik din
ye dariyā jab umaDtā hai to rokā kaise karte ho

ye to tai hai ki mujhe tujh se judā honā hai
misl aañsū huuñ tirī chashm-e-tamannā.ī meñ

yahī hai ruuh kā jauhar tum aaoge to niklegā
dam-e-āḳhir rukā hai ek aañsū chashm giryāñ meñ

tū hañsī le ke mirī aañkh ko aañsū de de
mujh se sūkhā huā dariyā nahīñ dekhā jaatā

aañsū to chiir kar saf-e-mizhgāñ nikal gayā
laḌkā thā ḳhurd-sāl pe dil kā karaḳht thā

āñkhoñ kā ḳhudā hī hai ye aañsū kī hai gar mauj
kashtī bache kyūñkar jo rahe aaTh pahar mauj

jab kisī kī aañkh kā aañsū ho jama.a suukh kar
dekhnā tum ye hī aañsū zalzala de jā.egā

daaġh ko chāñd aañsū ko motī zaḳhm ko phuul kaheñ
ham ko bhī andāz sikhā.e duniyā ne kyā kyā