Tags-Aansoo

tumheñ ġhamoñ kā samajhnā agar na aa.egā
to merī aañkh meñ aañsū nazar na aa.egā

chhalkā hai kahīñ shīsha Dhalkā hai kahīñ aañsū
gulshan kī havāoñ meñ naġhma bhī hai mātam bhī

us ke aañsū merī ḳhushiyāñ
ye saudā bhī mahñgā niklā

baiThā rahtā hai jahāñ hijr kā tanhā aañsū
merī āñkhoñ kā kināra hai, ḳhudā jāntā hai

maiñ jo dāman meñ laayā thā aañsū tire
daaġh haiñ un ke la.al-o-gohar kho ga.e

jo jiite jī hameñ zindāñ meñ dafnā kar yuuñ jaate haiñ
hamārī maut par aañsū bahā.enge bhalā vo kyuuñ

is pursish-e-karam pe to aañsū nikal paḌe
kyā tū vahī ḳhulūs sarāpā hai aaj bhī

mohabbat ke ye aañsū haiñ unheñ āñkhoñ meñ rahne do
sharīfoñ ke gharoñ kā mas.ala bāhar nahīñ jaatā

phūTī bhalī vo aañkh jo aañsū se tar nahīñ
kis kaam hai vo siip ki jis meñ guhar nahīñ

nahīñ hāl-e-dehlī sunāne ke qābil
ye qissa hai aañsū bahāne ke qābil

kabhī ḳhush kar ga.ī mujh ko tirī yaad
kabhī āñkhoñ meñ aañsū aa gayā hai

bahte haiñ baat baat par aañsū
aisī āñkhoñ ko kyā kare koī

vaqt kā dariyā le bhī gayā vo sab jo dil-o-jāñ se thā aziiz
DhūñDh rahe ho sāhil par ab aañsū kī tahrīr kahāñ

chashm-e-sahar meñ aas umiid kyā aañsū kī ik buuñd nahīñ
yuuñ dāman phailā.e chale haiñ rātoñ ke rahgīr kahāñ

aañsū haiñ kafan-posh sitāre haiñ kafan-rañg
lo chaak kiye dete haiñ dāmān-e-sahar ham

jazbāt tez-rau haiñ ki chashme ubal paḌe
jab dard tham sakā na to aañsū nikal paḌe

ḳhatm-e-majlis pe na aayā kabhī ronā ham ko
saare aañsū to shurūāt meñ bah jaate haiñ

ab to āñkhoñ meñ bhī aañsū nahīñ aate mere
ye alag ruup mire yaar udāsī kā hai

aarzū hai mirī āñkhoñ señ ravāñ hoeñ aañsū
nashtar-e-ġham señ rag-e-abr-e-guhar-bār kuuñ khol

ye to achchhā hai kī be-rañg hai aañsū varna
kis qadar daaġh liye phirtā hamārā chehra