Tags-Faith

tumheñ pyaar hai, to yaqīn do,
mujhe na kaho, tumheñ pyaar hai, mujhe dekhne kī na zid karo,

jis ko ab bhī ho siyāsat pe yaqīn
us ko ye mulk dikhāyā jaa.e

udaas āñkhoñ ke bādaloñ ne diloñ ke gard-o-ġhubār dho.e
yaqīn patthar banā khaḌā hai gumān paanī meñ bah rahā hai

jo ne dikhā.ī de sake us par yaqīn kījiye
ain-e-jamāl aur hai aks-e-jamāl aur shai

koī ummīd na va.ada na hausla koī
yaqīn hī nahīñ aatā chale ga.e ho tum

yaqīn kaise karūñ maiñ 'bāno'
sukūn kyā de sakeñ dilāse

yaqīn karne lage log rut badaltī hai
magar ye sach bhī karishma na ho ḳhitābat kā

jin se zinda ho yaqīn o āgahī kī aabrū
ishq kī rāhoñ meñ kuchh aise gumāñ karte chalo

mizāj-e-husn-o-mohabbat meñ sādgī na fareb
na vo yaqīn rahā ab na vo daġhā.eñ rahīñ

sabhī ko us kī aziyyat kā hai yaqīn magar
hamāre shahr meñ hai rasm-e-imtihān vahī

nahīñ nahīñ maiñ bahut ḳhush rahā huuñ tere baġhair
yaqīn kar ki ye hālat abhī abhī huī hai

ki ham bane hī na the ek dūsre ke liye
ab is yaqīn ko jiinā hayāt karte hue

yaqīn hai ki milegā uruuj ham ko bhī
yaqīn hai ki tirā bhī zavāl aa.egā

yaqīn jaano ye mere bāloñ meñ gard dekho
maiñ shahr vaalā tumhāre gaañv meñ rah chukā huuñ

yaqīn jaan ki terā vajūd hai mujh se
ye maan le ki agar maiñ nahīñ to tū bhī nahīñ

mujhe to aaj bhī tujh par yaqīn hai lekin
tire dayār meñ insāñ kī aabrū bhī nahīñ

ḳhushā vo raunaq-e-hañgāma-e-visāl ab to
yaqīn hī nahīñ aatā ki yuuñ huā hogā

yaqīn kis pe kareñ kis ko dost Thahrā.eñ
har āstīn meñ poshīda koī ḳhanjar hai

chāhiye ḳhud pe yaqīn-e-kāmil
hausla kis kā baḌhātā hai koī

hai gumāñ kyā yaqīn kā saaya
aur yaqīñ vāhime kī shiddat hai