Tags-Faith

barq sar-e-shāḳh-sār dekhiye kab tak rahe
ham ko yaqīn-e-bahār dekhiye kab tak rahe

gumān tak meñ na thiiñ jibra.īl ke jo kabhī
vo rif.ateñ haiñ yaqīn aaj aadmī ke liye

ki phir se taḳht ko aanā thā mere qadmoñ meñ
maiñ pur-yaqīn thā darbār se nikalte hue

jise sunāoge pahle hī sun chukā hogā
mujhe yaqīn hai ye aisā vāqi.a hogā

maiñ kaun yaqīn-e-bad-gumānī huuñ maiñ
agyānī huuñ hargiz nahīñ gyānī huuñ maiñ

dil ko gudāz bhī rakhā to ehtiyāt se
kar to liyā yaqīn par itnā nahīñ kiyā

tārīki-e-shab aur ho tārīk tarīn
tab dil ko mire aa.e haqīqat pe yaqīn

jinheñ qayās-o-shavāhid se vāsta hai unheñ
yaqīn-e-gardish-e-lail-o-nahār aa.egā

mujhe taġhayyur-e-mausam kā kuchh yaqīn dilā
agar tasalsul-e-bārāñ nahīñ to qatra bhej

tumhāre dil meñ koī aur bhī hai mere sivā
gumān to hai zarā sā magar yaqīn nahīñ

kab tak yaqīn ishq hameñ ḳhud na aa.egā
kab tak makāñ kā haal kaheñge makīñ se ham

mujhe yaqīn dilā sab rahegā vaisā hī
junūn-e-ahl-e-ḳharābat kuchh nahīñ karegā

maiñ huuñ yaqīn meñ gum aur vo gumān meñ gum
tamām rasm-e-mohabbat hai darmiyān meñ gum

koī bāteñ thiiñ koī thā sabab jo maiñ va.ada kar ke mukar ga.ī
tire pyaar par to yaqīn thā maiñ ḳhud apne aap se Dar ga.ī

tumhāre paaoñ ke nīche koī zamīn nahīñ
kamāl ye hai ki phir bhī tumheñ yaqīn nahīñ

tumheñ ilm nahīñ hai yaqīn karo maiñ qarīb se jāntā huuñ un ko
kuchh saudāgar aise bhī haiñ jo qarz vasūl nahīñ karte

palaT ke dekh luuñ tujh ko to sañg ho jā.ūñ
mire yaqīn ko aisī koī kahānī de

tū merī dastaras meñ rahegā yaqīn hai
duniyā nahīñ sahī to samāvāt par kabhī

maiñ us ke hone pe kāmil yaqīn rakhtā huuñ
mire yaqīn pe vo bhī yaqīn rakhtā hai

haañ haañ tirā raqīb se be-shak hai rabt-zabt
rutba yaqīn kā hai ziyāda gumān se