Tags-Faith

zarā yaqīn kā chashma lagā ke dekho to
abhī vafāoñ kā itnā akaal thoḌī hai

tujhe yaqīn agar hai apne hone kā
aa ai merī jān-e-be-navā bāhar aa

mujhe yaqīn ki mahfil kī raushnī huuñ maiñ
use ye ḳhauf ki mahfil ḳharāb kar dūñgā

maiñ intizār meñ huuñ tū koī savāl to kar
yaqīn rakh maiñ tujhe lā-javāb kar dūñgā

har ek jumbish-e-lab aur dil kī har dhaḌkan
sadā yaqīn banī inqalāb meñ likhiye

faizān-e-jalva aur zarā aam kījiye
dil ko to hai yaqīn-e-nazar mutma.in nahīñ

phir vo havā kā qahqaha kaan meñ gūñjne lagā
aur bhī ik diyā bujhā mujh ko yaqīn aa gayā

bas yūñhī kuchh gumāñ sā thā koī pas-e-suḳhan bhī hai
dar jo lab-kushā huā mujh ko yaqīn aa gayā

kār-e-ḳhulūs-e-yār kā mujh ko yaqīn aa gayā
itnā shadīd vaar thā mujh ko yaqīn aa gayā

ab mirā dard bujh gayā ab mirā zaḳhm bhar chalā
phir vahī dost aa.egā mujh ko yaqīn aa gayā

dā.era-vār thā safar ishq-e-junūñ-sifāt kā
hijr-o-visāl kuchh na thā mujh ko yaqīn aa gayā

koī yaqīn kare kyoñ kisī gavāhī pe
mujhe yaqīñ nahīñ jab apnī be-gunāhī pe

naqāb kahtī hai maiñ parda-e-qayāmat huuñ
agar yaqīn na ho dekh lo uThā ke mujhe

ye be-yaqīn sī āsūdgī batātī hai
ki ek qarya-e-vīrāñ mirī talāsh meñ hai

agarche pahle yaqīn kam thā par ab to tasdīq ho chukī hai
na jaane radd-e-amal meñ kyuuñ ham mazīd tāḳhīr kar rahe haiñ

bas is yaqīn pe hotī haiñ laġhzisheñ aksar
ki rahmatoñ kā bhī daatā hai tū azaab ke saath

maiñ ujaḌ ke bhī huuñ terā tū bichhaḌ ke bhī hai merā
ye yaqīn hai to kyuuñ hai ye qayās hai to kyuuñ hai

yaqīn-e-vāda-e-fardā hameñ bāvar nahīñ aatā
zabāñ se laakh kahiye aap ke tevar nahīñ kahte

kisī gumān pe kartā nahīñ yaqīn kabhī
kabhī yaqīn pe hotā nahīñ gumān mujhe

ahl-e-ḳhirad ko aaj bhī apne yaqīn ke liye
jis kī misāl hī nahīñ us kī misāl chāhiye