Tags-Faith

vo merī chāhat kī raushnī se nikal ke zulmat meñ jī rahā thā
yaqīn mujh ko nahīñ thā lekin vo mujh se kuchh bad-gumāñ thā pahle

kisī gumān-o-yaqīñ kī had meñ vo shoḳh-e-parda-nashīñ nahīñ hai
jahāñ na samho usī jagah hai jahāñ samajh lo vahīñ nahīñ hai

qadam qadam pe tazādoñ se sābiqa hai jahāñ
yaqīn kaise kare koī in gumānoñ par

parda uThte hī merī nazroñ se
kā.enāt-e-yaqīn Dolī hai

isī liye to jalātā huuñ āñdhiyoñ meñ charāġh
yaqīn hai ki nigahbān hone vaalā hai

'zāhid' be-tāqāzā-e-vafā tarah-e-yaqīn par
ham koshish-e-tāmīr-e-vatan karte raheñge

jise yaqīn thā har suud meñ ḳhasāre kā
thā apne-āp meñ sharh-e-ziyāñ kahāñ gayā maiñ

jo zikr aatā hai āḳhirat kā to aap hote haiñ saaf munkir
ḳhudā kī nisbat bhī dekhtā huuñ yaqīn ruḳhsat gumān baaqī

tumheñ yaqīn na hogā akele kamre meñ
maiñ apnī jaan se pyāre ḳhutūt paḌhtī huuñ

bin tumhāre maiñ jī gayā ab tak
tum ko kyā ḳhud mujhe yaqīn nahīñ

unheñ ye zo.am ki fariyād kā chalan na rahā
hameñ yaqīn ki muñh meñ zabān baaqī hai

yaqīn TuuT chukā hai gumān baaqī hai
hamāre sar pe abhī āsmān baaqī hai

ye baat baat par uThānā haath bad-duā ke vāste
mirā yaqīn kar halāl ko harām kar rahā huuñ maiñ

jin kā yaqīn rāh-e-sukūñ kī asaas hai
vo bhī gumān-e-dasht meñ mujh ko phañse lage

mujhe tumhāre tayaqqun se ḳhauf aatā hai
ki is yaqīn meñ shāmil gumāñ nahīñ merā

safīna Duubā nahīñ hai nazar se ojhal hai
mujhe yaqīn hai phir ek baar ubhregā

khaḌī hai shaam ki ḳhvāb-e-safar rukā huā hai
yaqīn kyuuñ nahīñ aatā agar rukā huā hai

tabassum ne kisī ke ruuh phūñkī gulsitānoñ meñ
shagūfoñ ko javānī kā yaqīn-o-e'tibār aayā

mirā yaqīn hai ye ḳhāmushī ye gahrā sukūt
ye log ḳhud nahīñ aate ye laa.e jaate haiñ

nahīñ nahīñ maiñ bahut ḳhush rahā huuñ tere baġhair
yaqīn kar ki ye hālat abhī abhī huī hai