Tags-Faith

pahuñchā na thā yaqīn kī manzil pe maiñ abhī
merā ḳhayāl mujh se bhī aage nikal gayā

na to ḳhvāhisheñ kabhī kam huiiñ na hī aas TuuTī kabhī mirī
thā ajiib rishta yaqīn se mire saath hī muflisī ga.ī

husn-e-yaqīn-e-āshiqī itnā tū pā.edār kar
ḳhud par bhī e'timād rakh un par bhī e'tibār kar

yaqīn-e-vāda nahīñ tāb-e-intizār nahīñ
kisī tarah bhī dil-e-zār ko qarār nahīñ

bātoñ par un kī kyuuñ na yaqīn aa.e phir mujhe
qasmeñ na.ī na.ī haiñ to paimāñ na.e na.e

yaqīn kaise karūñ maiñ tumhārī bātoñ kā
ki qatre ashk ke haiñ sho.alagī ke chehre par

jo samajh meñ aa.e vo baat kyā ye muāmalāt haiñ ishq ke
ki naqāb ruḳh pe rahe magar hai yaqīn ye vahī yaar hai

baḌhne lagī yaqīn o gumāñ meñ jo kashmakash
va.ada bhī sub.h o shaam pe Taltā chalā gayā

tujhe kis tarah se ḳhabar huī ki mirī hayāt sañvar ga.ī
zarā apne dil se to pūchh le ye gumān thā ki yaqīn thā

vahī ek sach thā aur us ke baa'd kī saarī tohmateñ jhuuT haiñ
mire dil ko puurā yaqīn hai vo mohabbatoñ kā amiin thā

vahī yaqīn rahā hai javāz-e-ham-safarī
jo gaah us ne kiyā aur gaah maiñ ne kiyā

shāyad vo sañg-dil ho kabhī mā.il-e-karam
sūrat na de yaqīn kī is ehtimāl ko

baḌe salīqe se toḌā mirā yaqīn us ne
ki naam apne hī kar lī hai sab zamīn us ne

tirī talāsh kī mīThī kasak se lutf liyā
yaqīn toḌne vaale ne shak se lutf liyā

ai mujh ko fareb dene vaale
maiñ tujh pe yaqīn kar chukā huuñ

haal pūchhā us ne mujh se baat kī
ab yaqīn aayā ḳhudā maujūd hai

kabhī hudūd se bāhar kabhī vo had meñ rahā
mirā yaqīn hamesha gumāñ kī zad meñ rahā

ye shauq saare yaqīn-o-gumāñ se pahle thā
maiñ sajda-rez navā-e-azāñ se pahle thā

tumhārī jiit kā tum ko yaqīn aa jaa.e
so ham tumhāre liye baar baar hārte haiñ