Tags-Faith

kuchh roz aur kal kī muravvat meñ kaaT leñ
dil ko yaqīn-e-va.ada-e-yār aa.e ye nahīñ

unheñ isī baat par yaqīn hai ki bas yahī asal kār-e-adeñ hai
isī sī hogā faroġh-e-qaumī isī se chamkeñge baap daade

to kyā yaqīn dilāne se maan jāoge?
yaqīñ dilā.ūñ ki ye hijr dil pe baar nahīñ

us raat ke idhar bhī hai ik sub.h kā vajūd
merā yaqīn bhī hai ye merā gumāñ bhī hai

yaqīn jaan le saaqī ki ḳhum kī ḳhair nahīñ
ḳhudā na karda jo ab ke mujhe ḳhumār aayā

vo kah gayā hai ki ā.ūñgā muntazir rahiyo
maiñ mubtalā-e-yaqīn-o-gumāñ visāl-o-firāq

yaqīn ho to koī rāsta nikaltā hai
havā kī oT bhī le kar charāġh jaltā hai

ummīd o yaas kī rut aatī jaatī rahtī hai
magar yaqīn kā mausam nahīñ badaltā hai

ajiib juzv hai ye mere jism kā ki yahāñ
kahīñ yaqīn hai qaa.em kahīñ gumāñ ābād

ye sach hai vahm ke daldal se lauT aayā huuñ
magar yaqīn kā dhuñdlā hai aa.ina ab tak

sab se yaqīn uThāyā ham ne dost paḌosī din tārīḳh
īd-milan ko ghar se nikle shor-e-mātam hone lagā

huā yaqīn farishtoñ ko ḳhāksārī kā
kafan likhā jo ye ḳhatt-e-ġhubār dekh chuke

tumhārī bazm meñ jis baat kā bhī charchā thā
mujhe yaqīn hai us meñ na zikr merā thā

ab un ke saare safar meñ sub.h-e-yaqīn koī
na shām-e-sad-e'tibār koī

tire vajūd se pahchān mujh ko apnī thī
tirā yaqīn thā mujh ko yaqīñ zamāne kā

mujhe yaqīn hai tere hī surḳh gāloñ ne
dhanak ko shoḳh sā ye rañg de diyā hogā

aadmī kā yaqīn kyā kiije
ab ḳhudā bhī gumān se niklā

fareb dil ne mohabbat meñ khaa.e haiñ kyā kyā
har ik fareb par ab tak yaqīn-e-mohkam hai

āñkheñ ḳhayāl ḳhvāb javānī yaqīn saañs
kyā kyā nikal rahā hai kisī ke hisāb meñ

duniyā samajh na pā.egī majbūriyāñ tirī
mujh ko to hai yaqīn ki tū bevafā na thā