Tags-Faith

yaqīn chhoḌ ke nayyar gumāñ pakaḌtā rahā
nigāh-e-yār tirā e'tibār karte hue

mirī chāhatoñ meñ ġhurūr ho dil-e-nā-tavāñ meñ surūr ho
tumheñ ab ke khānā hai vo qasam ki fareb meñ bhī yaqīn ho

sher kī sadāqat par ham yaqīn rakhte haiñ
maslahat ke chehroñ ko bā-naqāb likkheñge

kaun mujh par yaqīn lā.egā
apnī nazroñ meñ ḳhud sarāb huuñ maiñ

koī to shahr-e-tazabzub ke sākinoñ se kahe
na ho yaqīn to phir mo.ajiza na māñge koī

jafā kā terī tālib huuñ vafā hai mudda.ā merā
yaqīn-e-nā-murādī par bhī dekho hausla merā

ai mujh ko fareb dene vaale
maiñ tujh pe yaqīn kar chukā huuñ

mujh ko amaañ ho qarya-e-vahm-o-gumān meñ
de kar yaqīn dil se tū ḳhadsha nikāl de

raqam huā huuñ yaqīn o qayās donoñ meñ
kare to kaise kare merā tajziya koī

maiñ ghar ko phūñk rahā thā baḌe yaqīn ke saath
ki terī raah meñ pahlā qadam uThānā thā

hai ye saudā yaqīn kā 'shañkar'
but-parastī bhī haq-parastī hai

kiran kiran yaqīn jaise rāste
dhuāñ dhuāñ gumān ban ke rah ga.e

maiñ ek umr se ḳhud ko talāshtā huuñ magar
mujhe yaqīn nahīñ, huuñ bhī yā nahīñ huuñ maiñ

yaqīn thā ki koī sāneha guzarnā hai
gumāñ na thā ki tirā saath chhūT jā.egā

itnā yaqīn rakh ki gumāñ baaqī rahe
ek zarā kār-e-jahāñ baaqī rahe

yaqīn kar ki abhī tak hai dil ko tujh pe yaqīñ
ye husn-e-zan hai kisī bad-gumāñ ke baare meñ

ban kar lahū yaqīn na aa.e to dekh leñ
Tapkī haiñ pā-e-ḳhvāb se sahrā kī vus.ateñ

mujhe gumān hai ye bhī yaqīn kī had tak
kisī se bhī na vo merī tarah milā hogā

agar maiñ chāhūñ to 'mumtāz' āsmāñ meñ uḌuuñ
gumāñ yaqīn ko de duuñ yaqīñ gumān ko maiñ

vahī safar hai vahī rasm-e-āblā-pā.ī
yaqīn-e-rāh mirā kāmyāb ho ke rahā