Tags-Faith

yaqīn rakh ki tirī anjuman se ham bhī kabhī
tirī hī tarah se guzreñge be-niyāzāna

hai ishq juzv-e-lā-yatajazzā yaqīn jaan
ye qīmat-e-majāz-o-haqīqat ḳhatar meñ hai

be-nishānī-e-mohabbat ko nishāñ se kyā ġharaz
ai yaqīn-e-dil tujhe vahm-o-gumāñ se kyā ġharaz

yaqīn hai na gumāñ hai zarā sambhal ke chalo
ajiib rañg-e-jahāñ hai zarā sambhal ke chalo

hai jaane kyā pas-e-dīvār ā.īna jis par
yaqīn kar ke bhī dil vaqf-e-sad-gumāñ huā hai

maiñ dard-e-furqat se jāñ-ba-lab huuñ tumheñ yaqīn-e-vafā nahīñ hai
mujhe nahīñ e'tibār apnā tumheñ nahīñ e'tibār merā

terā yaqīn terā amal tere valvale
hastī kā e'tibār haiñ tū jaag to sahī

dushman harīf-e-rāh-e-vafā hai ḳhudā kī shaañ
vahāñ jis pe thā yaqīn mujhe us kā gumāñ na thā

kuchh jazb dil meñ jaan ke samjhe the un ko paas
ek vahm se yaqīn pe kyā kuchh gumāñ na thā

hadaf koī ho kahīñ ho yaqīn hai mujh ko
ye saare tiir usī kī kamāñ se aa.e haiñ

isī jahān meñ rahte haiñ ḳhūb-rū aise
yaqīn mujh ko huā us ko dekh kar bhī nahīñ

gumān hī asāsa thā yaqīn kā
yaqīn hī gumān meñ nahīñ rahā

shikast-e-ahd-e-sitam par yaqīn rakhte haiñ
ham intihā-e-sitam kā gilā nahīñ karte

ai mard-e-ḳhudā nafas ko apne pahchān
insān yaqīn hai aur allāh gumān

yaqīn jaan le saaqī ki ḳhum kī ḳhair nahīñ
ḳhudā na-karda jo ab ke mujhe ḳhumār aayā

kabhī yaqīn kī duniyā meñ jo ga.e sapne
udāsiyoñ ke samundar meñ kho ga.e sapne

tujhe yaqīn to shāyad na aa.egā lekin
ye sub.h koī karishma dikhāne vaalī hai

vo diye pe thā na havā pe thā
jo yaqīn apne ḳhudā pe thā

shahr-e-tarab meñ milte haiñ apne bhī naqsh-e-pā
aa.e na gar yaqīn to aao dikhā.eñ ham

maiñ kis yaqīn se likkhā gayā huuñ miTTī par
vo kaun hai jo mire silsile kī Dhaal banā