Tags-Faith

be-sukūn shāmoñ se be-yaqīn sub.hoñ tak
tai huā hai āḳhir har marhala bichhaḌne kā

yaqīn maano ki bijliyāñ bhī falak se aa kar panāh leñgī
chaman meñ sulh-o-safā ke tinkoñ se āshiyāna banā rahā huuñ

vo jo tum ne nām-e-ḳhudā liyā sabhī ranjishoñ ko bhulā diyā
mujhe ab yaqīn ye aa gayā ki zamāna itnā burā nahīñ

tujhī ko DhūñDhtā phirtā thā dar-ba-dar phir bhī
mujhe yaqīn thā rusvā.ī kū-ba-kū hogī

nasīb paḌh ke mirā ilm-e-ġhaib kī devī
yaqīn jāniye behosh hone vaalī thī

mujhe yaqīn dilā hālat-e-gumāñ se nikāl
ġham-e-hayāt ko baḌhte hue ziyāñ se nikāl

ḳhizāñ ke dasht meñ jashn-e-bahār bhī hogā
na jaane kis liye yuuñ pur-yaqīn huuñ ḳhush huuñ

mausamoñ par yaqīn kyuuñ chhoḌā
bad-gumānī to sā.ebāñ se huī

mujh ko 'dā.em' yaqīn se bichhḌe
ek arsa guzar gayā dekho

zamīn-e-hind hai aur āsmān-e-āzādī
yaqīn ban gayā ab to gumān-e-āzādī

uThā hī laayā sabhī rāste vo kāñdhoñ par
yaqīn us pe na kartā to maiñ kidhar jaatā

vo kahegā yaqīn hai mujh par
maiñ kahūñgī tirā yaqīn kiyā

un ko ḳhud par bhī jab yaqīn nahīñ
merā sar bhī kaTā ke kyā hogā

bikhar ga.e the so ḳhud ko sameT bhī lete
ki is yaqīn meñ shāmil mirā qayās na thā

vatan kī ḳhaak zarā eḌiyāñ ragaḌne de
mujhe yaqīn hai paanī yahīñ se niklegā

yaqīn-e-lutf-o-karam aap agar dilā.eñ use
'nasīr' halqa-e-auhām se rihā ho jaa.e

gumān gaañv se maiñ chalā thā yaqīn kī manziloñ kī jānib
magar tavahhum ke jañgaloñ meñ hī rāsta ḳhatm ho gayā hai

libās-e-gul meñ vo ḳhushbū ke dhyān se niklā
mirā yaqīn bhī vahm-o-gumān se niklā

gumāñ to Thiik maiñ kaise kahūñ yaqīn bhī hai
ki mere paañv ke nīche kahīñ zamīn bhī hai

un ke mazīd va.adoñ pe kaise yaqīn ho
ab tak jo va.ada kar ke barābar makr ga.e