Tags-Faith

jahāñ pe zulm-o-sitam had se apnī baḌhte haiñ
yaqīn maano vahīñ inqalāb hotā hai

yaqīn kar lo ki ab na pīchhe qadam haTegā
ye āḳhirī had thī aur ham is tak aa ga.e haiñ

tujhe ab bhī mere ḳhulūs kā na yaqīn aa.e to kyā karūñ
tire gesuoñ ko sañvār kar tujhe aa.ina bhī dikhā diyā

kis kā yaqīn kījiye kis kā na kījiye
har chāragar mujhe to luTerā dikhā.ī de

hameñ yaqīn nahīñ hai kisī dikhāve meñ
so samt-e-hijr meñ ham sādgī se nikle haiñ

yaqīn kaun karegā gumāñ pe aayā huuñ
maiñ apne aap se chhup kar yahāñ pe aayā huuñ

yaqīn jaan bahut Dar gayā thā us din jab
gale se tū ne achānak lagā liyā thā mujhe

tirā yaqīn huuñ maiñ kab se is gumān meñ thā
maiñ zindagī ke baḌe saḳht imtihān meñ thā

pichhle baras ke ishq pe ham ko yaqīn thā
agle baras kā ishq gumānī kareñge ham

us pe itnā yaqīn hai ham ko
us ko betāb ho ke dekhte haiñ

sālim yaqīn-e-azmat-e-sehr-e-ḳhudā na toḌ
māyūs ho ke kāsa-e-dast-e-duā na toḌ

yaqīn jaano tumhāre jaane ke ba.ad koī rachā na maz.hab
tumhārī tasbīh tumhāre sajde tumhāre kalme bulā rahe haiñ

use yaqīn hai kitnā mirī vafāoñ kā
ḳhilāf apne kisī roz varġhalā.ūñ use

vo hasīn thī mah-e-jabīn thī
be-gumān thī be-yaqīn thī

ḳhushā vo raunaq-e-hañgāma-e-visāl ab to
yaqīn hī nahīñ aatā ki yuuñ huā hogā

apnī taqdīr par yaqīn nahīñ
aap se bad-gumāñ nahīñ huuñ maiñ

ta.alluqāt meñ vo marhale bhī kaise the
yaqīn aur gumāñ ke jo darmiyāñ guzre

yaqīn itnā nahīñ merā jitnā nabz kā hai
mirī zabān se suntā nahīñ vo haal mirā

nahīñ ye ġham ki amānat meñ kyuuñ ḳhayānat kī
mujhe ye dukh hai vo apnā yaqīn beach aa.e

yaqīn aur gumāñ kī jañg se gurez thā nahīñ
jo faisla kiyā hai us se inhirāf kyā kareñ