Tags-Faith

maiñ dil kī vārdāt to kahne ko kah chalūñ
kis ko yaqīn aa.egā mere bayān kā

merī baat kā yaqīn na aa.e
to chand lamhoñ ke liye

fitna-e-shab ne ḳhatm kiyā sab āñkhoñ kā āzār
saare ḳhvāb haqīqat ban ga.e saare vahm yaqīn

mujh se mil kar kis ko yaqīn ab aa.egā
maiñ bhī terā TuuTā huā ik rishta huuñ

kaise vo din the pyaar ke ḳhud pe bhī jab yaqīn thā
pal meñ judā.ī Daal lī pal meñ visāl kar liyā

ajab yaqīn sā us shaḳhs ke gumān meñ thā
vo baat karte hue bhī na.ī uḌaan meñ thā

yaqīn ho to koī rāsta nikaltā hai
havā kī oT bhī le kar charāġh jaltā hai

khulī jab aañkh gumāñ se yaqīn kī jānib
to manzaroñ kī ikaa.ī samajh meñ aane lagī

mujhe huā yaqīn apne ishq ke shabāb par
jab āñsuoñ ke rāstoñ pe mere dil kā ḳhuuñ chalā

vo be-yaqīn bharosa na kar sakā varna
the mere saath ka.ī log e'tibār ke bhī

yaqīn kaise nahīñ aa.egā unheñ mujh par
vafā meñ fard huuñ ḳhauf-o-ḳhatar uThā kar maiñ

aayā nahīñ yaqīn bahut der tak hameñ
apne hī ghar kā dar hai ye bāb-e-qafas nahīñ

ḳhushā vo raunaq-e-hañgāma-e-visāl ab to
yaqīn hī nahīñ aatā ki yuuñ huā hogā

ik be-yaqīn raat mirī raat kī sharīk
ik be-dayār shaam dil-e-nā-rasā ke saath

yaqīn-e-sub.h-e-chaman hai kitnā shu.ūr-e-abr-e-bahār kyā hai
savāl karte haiñ dasht-o-dariyā ki qāfile kā vaqār kyā hai

shikast-e-ahd-e-sitam par yaqīn rakhte haiñ
ham intihā-e-sitam kā gilā nahīñ karte

yaqīn jāniye is meñ koī karāmat hai
jo is dhueñ meñ mirī saañs bhī salāmat hai

phir us kī baat kā kaise yaqīn aa jaa.e
vo jis kī baat kā andāz hī nirālā ho

Dhaltī rahī nigāh meñ chehroñ kī chāñdnī
nāzil hue yaqīn gumānoñ pe rāt-bhar

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh