Tags-Faith

ab safar hai yaqīn kī jānib
vasvase aur gumān chhoḌ aa.e

kar ke yaqīn phir se ki maiñ mushkiloñ meñ huuñ
Thahrā nahīñ vo shaḳhs dobāra guzar gayā

lams-o-yaqīñ apnā kahāñ pesh-o-pas meñ thā
to phir ye kaisā josh sadā-e-jaras meñ thā

mujhe yaqīn hai tū shart haar jā.egā
ki dastaras se tirī āsmān ūñchā hai

numū ke vāste koshāñ haiñ is yaqīn ke saath
baḌe hue to ham is kā gumāñ na rakkheñge

pukārtā huuñ maiñ al-amān al-amān allāh
bachā le mere yaqīnullāh kī jaan allāh

insān terī fat.h pe ab bhī yaqīn hai
go apnī zindagī se bhī ghabrā ga.e haiñ ham

merī sadāqatoñ pe tumheñ kyuuñ nahīñ yaqīn
sau baar aag se bhī guzārī ga.ī huuñ maiñ

nikaltī kis tarah koī yaqīn kī sūrat
yaqīn kī koī sūrat nahīñ banā.ī ga.ī

yaqīn hai ki kabhī be-asar nahīñ hogī
duā laboñ pe machalne ke baad aa.ī hai

na meñ yaqīn meñ rakhkhūñ na to gumān meñ rakh
hai sab kī baat to phir sab ke darmiyān meñ rakh

vo apnā chehrā agar dikhā.e yaqīn andhoñ ko ḳhaak aa.e
pukārtī hai ye be-hijābī ki maiñ azal se hijāb meñ huuñ

yaqīn jaan tū vaa.iz ki diin o duniyā meñ
bas us kī sirf mujhe zaat kā sahārā hai

zarā bhī jis kī vafā kā yaqīn aayā hai
qasam ḳhudā kī usī se fareb khāyā hai

har-nafas tum yaqīn-e-mun.im se
rizq apne gumān kā māñgo

safar pe yuuñ musir huuñ maiñ ki hausloñ meñ jaan hai
jo luT chukā yaqīn thā jo bach gayā gumān hai

hasīn ḳhvāb na de ab yaqīn-e-sāda de
mire vajūd ko yā rab nayā labāda de

mire dil meñ tuḳhm-e-yaqīn rakh de lachak tū shāḳh-e-mizāj ko
vo chaman khilā mire bāġhbāñ jo chaman koī na khilā sakā

uThā hī laayā sabhī rāste vo kāñdhoñ par
yaqīn us pe na kartā to maiñ kidhar jaatā

faqat yaqīn pe chaltā hai zindagī kā safar
vagarna kaun hai jo Dho rahā savāl nahīñ