Tags-Falak

jahāñ koī sitam ījād kiyā mujhe kah ke falak ne ye yaad kiyā
ki bas ek dil-e-'bedam' ke sivā koī qābil-e-mashq-e-jafā hī nahīñ

rasm-e-āshufta-sarī meñ haiñ garebāñ dāman
falak-e-pīr batā kaun hai sachchā jhūTā

aise bhī bānī-e-be-dād haiñ kuchh duniyā meñ
falak-e-pīr bhī detā hai jinheñ jhuk ke ḳhirāj

matā-e-zīst marī laakh hech-māyā sahī
magar sitāre falak ke na jaane kyuuñ yūñhī

ai falak jis jis tarah kā ġham tū chāhe mujh ko de
maiñ kabhī nālāñ na huuñ hargiz rahūñ har dam ḳhushī

pahle bhī chāñd sitāre the falak par maujūd
gesū-e-shab ko bahāroñ ne sañvārā to na thā

falak ke paar uḌānoñ kī had nahīñ hotī
vagarna dūsrī jānib bhī ik zamīñ hotī

ai falak ham bhūlte jaate haiñ andāz-e-ḳhalīl
ham pe añgāre bhī barsā phuul barsāne ke ba.ad

dard ye dil meñ uThā raat ki ho garm-e-tapish
uḌ gayā suune falak meñ par-e-ahrār lagā

jo pahuñche tā-falak shohra tumhārī ḳhud-faroshī kā
ḳharīdārī ko aa.e mushtarī bāzār-e-anjum se

falak ko vajd hogā ai parī tere tabassum se
utar aa.egī zohra raqs kartī bazm-e-anjum se

falak pe chāñd sitāre nikalne haiñ har shab
sitam yahī hai nikaltā nahīñ hamārā chāñd

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

lā-makāñ tak kahīñ Thahrā na mirā pā-e-ḳhayāl
mazra-e-sabz-e-falak biich meñ pāmāl huā

nahīñ hai aur koī sirf maiñ huuñ
falak se ye sadā aa.ī bahut hai

mīnāroñ se uupar niklā dīvāroñ se paar huā
hadd-e-falak chhūne kī dhun meñ ik zarra kohsār huā

falak pe uḌte hue bhī nazar zamīñ pe rahī
mizāj mujh ko muqaddar se tā.irāna milā

chaman meñ mere aañsū the jinheñ shabnam kahā sab ne
falak par merī aaheñ thiiñ jinheñ sab kahkashāñ samjhe

pau phāTnā nahīñ ye mujh sīna-chāk ke hai
har sub.h bār-e-ġham se chhātī falak kī फटनी

kahtā hai ye mushtarī falak par
yūsuf tire haath meñ bikā huuñ