Tags-Friendship

ye jahāñ tanhā bhalā kyā mujh ko de paatā shikast
maiñ ne kab khāyā fareb-e-dostī tere baġhair

itnā to dostī kā sila dījiye mujhe
apnā samajh ke zahr pilā dījiye mujhe

dukhoñ se aur ġhamoñ se dostī hai
haqīqat meñ yahī to zindagī hai

jo hakīm paas maiñ jā.ūñ huuñ to vo dostī se sunā.e hai
tū ma.āsh kī bhī talāsh kar ye maqām-e-faqr-o-fanā nahīñ

dostī aam hai lekin ai dost
dost miltā hai baḌī mushkil se

dostī kī ye zarūrī shart ho jaise koī
har qadam par dostoñ ne de diyā dhokā hameñ

dostī kyā us talavvun-tabā kī
chaar din sāhab salāmat ho ga.ī

taultā thā ik ko ik ashyā-e-masraf kī tarah
dostī thī aur andāz-e-nazar aisā bhī thā

shajar ne tund havāoñ se dostī kar lī
shikasta pattoñ kī bauchhār mere ghar pahuñchī

zindagī gum na dostī gum hai
ye haqīqat hai aadmī gum hai

maslahat chāhe rahūñ Daale tasanño kā naqāb
dostī kī maañg chehre par koī parda na ho

is dostī kā terī talavvun-mizājī se
apne ta.iiñ gumān kabhī hai kabhī nahīñ

na dostī na dushmanī
merā kaam to hai raushnī

paḌī niiv aapas meñ go dostī kī magar dostī kis tarah nibh sakegī
use hai nazākat mujhe hai naqāhat na vo aane vaalā na maiñ jaane vaalā

us shaḳhs se 'shamīm' kā rishta ajiib thā
kuchh dushmanī kā rañg thā kuchh dostī sī thī

hai ye kaisī sohbat mai-kashāñ ki har ek jaam lahū lahū
yahī dostī hai to ai ḳhudā mujhe raas aa.e na dostī

dostoñ se dushmanī aur dushmanoñ se dostī
be-muravvat bevafā be-rahm ye kyā Dhañg hai

mujhe dost kahne vaale zarā dostī nibhā de
ye mutālba hai haq kā koī iltijā nahīñ hai

mere aañsū tumhārī āñkhoñ meñ
ab bhī baaqī hai dostī shāyad

badan kāñToñ se kar Daalā hai chhalnī
hamārā gul-ruḳhoñ kī dostī ne