Tags-Gham

har ek mausam meñ raushnī sī bikherte haiñ
tumhāre ġham ke charāġh merī udāsiyoñ meñ

sharīk-e-ġham na ho koī to achchhā
akelī ho to tanhā.ī bahut hai

dil kī taḌap ke vāste mahbūb nā-guzīr
rāh-e-vafā meñ ġham ke kināyāt ham-safar

ḳhūgar-e-zabt haiñ rusvā na kareñge tujh ko
ham ne duniyā se tire ġham ko chhupā rakkhā hai

vahī rañg-e-ruḳh pe malāl thā ye pata na thā
mirā ġham bhī shāmil-e-hāl thā ye pata na thā

ġham diye haiñ zindagī ne ġham se māyūsī nahīñ
chhoḌ kar ab zindagī ko ham kahīñ jaate nahīñ

ġham-o-ranj-o-hirmān-o-andoh ko
mirā siina mulk-e-baqā ho gayā

qasam jise zabt-e-ġham kī de kar uThā diyā apne dar se tū ne
kahīñ vo dīvāna umr apnī baġhair tere basar na kar de

terā ġham bhī na ho to kyā jiinā
kuchh tasallī hai dard hī se mujhe

vo jo ġham se chuur thā kaun thā
jo ḳhushī ḳhushī hai ye kaun hai

pahan rahe the kisī ġham kā pairahan kuchh log
agarche mahñgā paḌā mujh ko par liyā maiñ ne

jo kisī par na huā ho vo sitam ho to kaho
ab nirālā koī afsāna-e-ġham ho to kaho

har jafā ġham hai mire zarf kī pahnā.ī meñ
mere hoñToñ pe kabhī zikr-e-sitam ho to kaho

har qadam ġham kī salīboñ se guzarnā hogā
marhala dard kā āsān kahāñ hotā hai

ishq ehsās-o-kam-o-besh kā pāband nahīñ
jab havas ho to ġham-e-sūd-o-ziyāñ hotā hai

ġham jo baḳhshā hai mujhe tū ne ġhazal kī sūrat
ḳhuun pī pī ke shab-o-roz javāñ hotā hai

dāġh-e-dil ko raushan kar ġham kī raat hai lambī
sham.a kā bharosa kyā mah bhī bevafā sī hai

kyūñki badal deñ ne.amat-e-ġham ko ḳhushī se ham
kis tarah maañg laa.eñ tabassum kisī se ham

ḳhāmoshiyoñ ne qissa-e-ġham bhī bhulā diyā
ab baat bhī kareñ to kareñ kyā kisī se ham

zindagī ḳhud hī sañvar jā.egī
ġham ke sāñche meñ to Dhalnā sīkho