Tags-Gham

nashāt-e-ġham meñ to dard-e-nihāñ talāsh na kar
nashāt-e-ġham kabhī dard-e-nihāñ se ḳhālī hai

urūj-e-ġham mire soz-e-jigar se aa pūchhā
maqām-e-dil kahīñ soz-e-nihāñ se ḳhālī hai

kyuuñ mumlikat-e-ishq se be-daḳhl kiyā thā
ab masnad-e-ġham se to utarne kā nahīñ maiñ

aah ye aañsū pyāre pyāre
likh de hisāb-e-ġham meñ hamāre

un ke ġham se hai jāvedāñ varna
ziist ko be-sabāt kahte haiñ

ishq kī istilāh meñ ġham ko
inqalāb-e-hayāt kahte haiñ

avval avval thiiñ rāheñ baḌī pur-ḳhatar kaun thā juz ġham-e-dil sharīk-e-safar
phir jo paḌne lagī manziloñ par nazar dost dushman sabhī yaar bante ga.e

yahī hādsāt-e-ġham haiñ to ye Dar hai jiine vaalo
koī din meñ zindagī kā koī aur naam hogā

saare jo ġham-gusār the kab ke raqīb ban chuke
aise meñ dostoñ koī apnā ye ġham sunā.e kyuuñ

maiñ ahl-e-fikr kī bastī bhī rauñd aayā huuñ
kahīñ koī ġham-e-hastī kā rāzdāñ na milā

kuchal ke yaad kī lāsheñ guzar gayā ġham-e-dahr
maiñ DhūñDhtā rahā zaḳhmoñ kā bhī nishāñ na milā

apne maraz-e-ġham kā hakīm aur koī hai
ham aur tabīboñ kī davā kuchh nahīñ karte

mauj-e-nashāt o sail-e-ġham-e-jāñ the ek saath
gulshan meñ naġhma-sañj ajab andalīb thā

sab Duub ga.e talḳhi-e-nākāmi-e-ġham meñ
kuchh aap ke dāman ke sahāre nikal aa.e

hazār ehtiyāt kī hai laakh ġham chhupā.e haiñ
magar taḌap uThā hai dil vo jab bhī yaad aa.e haiñ

jo dil sajā chuke the ḳhud-parastiyoñ kī anjuman
ham un meñ jazba-e-ġham-e-jahāñ ubhār aa.e haiñ

koī pahāḌ koī ban talāsh karte haiñ
dimāġh bār-e-masā.ib kā ġham uThā.e hue

ye ḳhud-kalāmī ye be-niyāzī ye shahr vāloñ se duur rahnā
amānateñ 'āzmī' yaqīnan kisī ġham-e-lā-zavāl kī haiñ

reza reza sā bhalā mujh meñ bikhartā kyā he
ab tirā ġham bhī nahīñ hai to ye qissa kyā hai