Tags-Gham

tumhāre ġham ke sivā aur koī ġham bhī na thā
tumhāre dard mire dard kī asaas rahe

ban jā.eñgī qarār yahī be-qarāriyāñ
ġham de gayā hai jo vo miTāne bhī aa.egā

hijr meñ khulte haiñ asrār-e-mohabbat kyā kyā
ġham meñ ye mo.ajiza-e-husn-e-masīhā hī sahī

bhar ke sāġhar kījiye ḳhālī ġham-e-daurāñ se dil
ab na kar tāḳhīr ai saaqī shitābī tū pahuñch

ġham-e-vajūd kā mātam karūñ to kaise jiyūñ
magar ḳhudā tire dāman pe daaġh hai ki nahīñ

ḳhvāboñ kā nashsha hai na tamannā kā silsila
ab rah gayā hai bas ġham-e-duniyā kā silsila

ham mashq-e-fikr-e-vasl-o-ġham-e-hijr se 'asad'
laa.eq nahīñ rahe haiñ ġham-e-rozgār ke

ġham sabhī dil se ruḳhsat hue
dard be-intihā rah gayā

ye bhī kuchh kam nahīñ hai ki dil
gard-e-ġham se aTā rah gayā

hai kaun shai jis kī zid nahīñ hai jahāñ ḳhushī hai malāl bhī hai
ġham-e-judā.ī na khā tū ai dil firāq hai to visāl bhī hai

laboñ pe hai jo tabassum to aañkh pur-nam hai
shu.ūr-e-ġham kā ye aalam ajiib aalam hai

kahāñ ye zindagi-e-harza-gard le aa.ī
na rahguzār-e-tarab hai na jāda-e-ġham hai

kuchh aise ham ne tire ġham kī parvarish kī hai
ki jaise maqsad-e-hastī faqat tirā ġham hai

un dil-āvāroñ ke altāf par ai dil tū na bhuul
rañj kal deñge yahī aaj jo ġham-ḳhvār haiñ sab

ġham se mansūb karūñ dard kā rishta de duuñ
zindagī aa tujhe jiine kā salīqa de duuñ

soz-e-ġham-e-dūrī ne jilā rakkhā hai
aahoñ ne kañval dil kā bujhā rakkhā hai

koī aalam ho bahar-hāl guzar jaatā hai
ham na sargashta-e-rāhat haiñ na āshufta-e-ġham

nāla-e-ġham sho.ala-asar chāhiye
chāk-e-dil ab tā-ba-jigar chāhiye

kitne mah-o-najm hue nazr-e-shab
ai ġham-e-dil ab to sahar chāhiye