Tags-Gham

duur hai dil manzil-e-ġham se hanūz
ik ġhalat andāz-e-nazar chāhiye

dil ke ġham ne dard-e-jahāñ se mil ke baḌā bechain kiyā
pahle palkeñ pur-nam thiiñ ab aariz bhī namnāk hue

kitne alhaḌ sapne the jo duur sahar meñ TuuT ga.e
kitne hañsmukh chehre fasl-e-bahārāñ meñ ġhamnāk hue

hameñ to aaj bhī ġham-hā-e-do-jahāñ haiñ aziiz
vo aur haiñ jo gurezāñ dikhā.ī dete haiñ

mazāq kal jo uḌātī thī ġham ke māroñ kā
vo aañkh kyuuñ nazar aatī hai sogvār mujhe

milī jo mohabbat ke badle meñ nafrat
hameñ ahl-e-duniyā ke ġham yaad aa.e

har choT kā hāsil haiñ bilakte hue aañsū
ye dard ye ġham qismat-e-insāñ to nahīñ hai

ai dost maiñ jiitā huuñ tire ġham ke sahāre
aġhyār kā mujh par koī ehsāñ to nahīñ hai

yuuñ dil hai har ik rañj-o-alam kā mutahammil
lekin ġham-e-daurāñ ġham-e-jānāñ to nahīñ hai

kiyā ġham ne sarāyat be-nihāyat
karūñ kis siiñ shikāyat be-nihāyat

hamāre qatl par muftī ne ġham ke
nikālā hai rivāyat be-nihāyat

hujūm-e-rañj-o-ġham ne is qadar mujh ko rulāyā hai
ki ab rāhat kī sūrat mujh se pahchānī nahīñ jaatī

ġham-e-hayāt o ġham-e-kā.enāt se haT kar
kisī kī qāmat o gesū kā mājrā kahiye

ajiib lahar meñ ham ne havā kā saath diyā
ajiib moḌ pe ab ġham-shanās chhoḌ ga.ī

ye jahān-e-āb-o-gil hai imtihāñ-gāh-e-shu.ūr
ġham ba-qadr-e-azmat-e-kirdār baḌhtā jaa.e hai

haal ke sailāb meñ to bah ga.ī maazī kī laash
dafn ab kis kī galī meñ ham ġham-e-fardā kareñ

un se jo ġham milā us ġham ko
ik sauġhāt-e-vafā Thahrāyā

ḳhushī kī aarzū kyā dil meñ Thahre
tire ġham ne biThā rakkhe haiñ pahre

nā-murād dil kaise sub.h-o-shām karte haiñ kaise zinda rahte haiñ aur kaise marte haiñ
tum ko kab nazar aa.ī ġham-zadoñ kī tanhā.ī ziist be-amāñ kyā hai tum na jaan pāoge

kis se kahūñ apnā ġham-e-dil aah azīzāñ
duniyā meñ koī mūnis-o-ġham-ḳhvār na paayā