Tags-Gham

yuuñ nibāhā tirā vaada tire ġham ne barsoñ
ġham-e-ayyām kī paimāñ-shikanī yaad aa.ī

mujhe jis ne merā patā diyā vo ġham-e-nihāñ mire saath hai
mirī zindagī mirī raushnī dil‌-be-amāñ mire saath hai

ye jo aañkh aaj chhalak uThī mire dil kā bhed hī khul gayā
maiñ samajh rahā thā ye ab talak ġham-e-be-nishāñ mire saath hai

yahī soch kar maiñ huuñ mutma.in tahī-dast phir bhī nahīñ huuñ maiñ
mire dost go ki chale ga.e ġham-e-dostāñ mire saath hai

kaleja thaam kar sunte haiñ lekin sun hī lete haiñ
mire yāroñ ko mere ġham kī talḳhī bhī mazā de hai

dard-o-ġham-e-hayāt kā darmāñ chalā gayā
vo ḳhizr-e-asr-o-īsa-e-daurāñ chalā gayā

tere ḳhayāloñ ke parde se jab ġham-e-duniyā jhāñk uThā
ruk ga.ī jaise vaqt kī gardish ho ga.ī dil par bhārī raat

shab-e-ġham zahr hī khāne kā maza thā varna
intizār-e-sahar-e-vasl ne maarā hotā

ġham-e-habīb nahīñ kuchh ġham-e-jahāñ se alag
ye ahl-e-dard ne kyā mas.ale uThā.e haiñ

darāz hai shab-e-ġham soz-o-sāz saath rahe
musāfiro mai-e-mīnā-gudāz saath rahe

ham jo TuuTe to ġham-e-dahr kā paimāna bane
ḳhaak meñ mil ke bhī ḳhāk-e-rah-e-mai-ḳhāna bane

kaun is bazm meñ samjhegā ġham-e-dil kī zabāñ
baat chhoTī sī jab afsāna-dar-afsāna bane

ai mire hausla-e-ġham hai yahī vaqt-e-vafā
zahr hī hāsil-e-sad-umr-e-tamannā na bane

ruuh par haavī na ho jaa.e fazā-e-sogvār
ham ġham-e-dil se nishāt-e-jāvedāñ paidā kareñ

nahīñ koī rāhbar to kyā ġham
kisī taraf ko to jā rahā huuñ

ye nā-tavānī meñ bhī hai dam-ḳham
ki bojh ġham ke uThā rahā huuñ

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

hamārī jaan se ġham ne liye hazāroñ kaam
hamārī ḳhaak se bhī kaam le liyā jaa.e

zabt-e-ġham se sivā malāl huā
ashk aa.e to jī bahāl huā

pahle har ġham kī mohabbat meñ pazīrā.ī kar
chaak phir dāman-e-tamkīn-o-shakebā.ī kar