Tags-Gham

ġhazab se hai vaañ jo chiiñ jabīñ par hujūm-e-ġham hai dil-e-hazīñ par
lahū ke dhabbe haiñ āstīñ par hai dāman ashkoñ se laal kaisā

āzād-gān-e-ishq har ik haal meñ haiñ shaad
hoñge asīr-o-ranj-o-ġham-o-yās aur log

dekh letā huuñ tabassum husn kā
ġham-parastī merī fitrat hī sahī

kyā pūchhte ho marīz-e-ġham ko
kaam us kā tamām ho chukā hai

merī tasvīr ko ġhamnāk tū khīñch ai maanī
shakl ushshāq kī dil-gīr bhalī lagtī hai

ye bādal ġham ke mausam ke jo chhaT jaate to achchhā thā
ye phailā.e hue manzar simaT jaate to achchhā thā

dil dabā jaatā hai kitnā aaj ġham ke baar se
kaisī tanhā.ī Tapaktī hai dar o dīvār se

zarā sī baat pe ghuT ghuT ke sub.h kar denā
mirī tarah bhī koī merā ġham-gusār na ho

rahā be-ḳhabar ahl-e-ġhurbat ke ġham se
so ḳhud gir rahā huuñ maiñ apnī nazar se

sahe ġham pa.e raftagāñ kaise kaise
mire kho ga.e kārvāñ kaise kaise

be-bāda bhī ġham se duur ho jaatā huuñ
ḳhud hāsil-e-sad surūr ho jaatā huuñ

ġham-e-ishq hī ne kaaTī ġham-e-ishq kī musībat
isī mauj ne Duboyā isī mauj ne ubhārā

tire ġham kī parda-poshī jo isī kī muqtazī hai
to qasam hai tere ġham kī mujhe har ḳhushī gavārā

mirī kashti-e-tamannā kabhī ḳhushkiyoñ meñ Duubī
kabhī bahr-e-ġham kā tinkā mujhe de gayā sahārā

ik anokhe dard ke paḌ rahe haiñ bhañvar yahāñ
abhī bahr-e-ġham meñ tamavvujāt ajiib haiñ

huā huuñ ḳhaak us ke ġham meñ to bhī sīna-sāfī se
nahīñ khotā hai vo ā.īna-rū dil se ġhubār apnā

ġham-e-duniyā se gar paa.ī bhī fursat sar uThāne kī
falak kā dekhnā taqrīb tere yaad aane kī

lipaTnā parniyāñ meñ shola-e-ātish kā pinhāñ hai
vale mushkil hai hikmat dil meñ soz-e-ġham chhupāne kī

lagtā hai ki phailegī shab-e-ġham kī siyāhī
aañsū mirī palkoñ pe sar-e-shām na aa.e

'mehr' hirbā se dostī tā-chand
ġham nahīñ rañg ke badalne kā