Tags-Gham

kabhī jo maiñ ne masarrat kā ehtimām kiyā
baḌe tapāk se ġham ne mujhe salām kiyā

kabhī hañse kabhī aaheñ bharīñ kabhī ro.e
ba-qadr-e-martaba har ġham kā ehtirām kiyā

āġhāz-e-shab-e-ġham hai kyuuñ sone lage taare
shāyad mirī āñkhoñ se kuchh niind churā.ī hai

dil ġham-e-ishq ke iz.hār se katrātā hai
aah ġham-ḳhvār ki ġham-ḳhvār se katrātā hai

dil-e-parvarda-e-ġham ḳhushiyoñ se yuuñ jaatā hai
'soz' ik baal juuñ aġhyār se katrātā hai

ġham-zadoñ kī ye ḳhāmushī hai ġhazab
sabr kā intiqām are tauba

ham is tarah se baTā.eñge haath duniyā kā
kuchh ek ġham na.e ījād karte jā.eñge

log mujh ko bhī shahīd-e-ġham-e-daurāñ kahte
neza-e-vaqt pe goyā jo mirā sar hotā

ġhunūda dīn-e-buzurgāñ meñ ab vo lau na rahī
jo ahd-e-nau ke ġham-e-ātishīñ meñ hotī hai

māmūr hai nashāt-e-ġham-e-dil se zindagī
tujh ko 'shamīm' fikr-e-ġham-e-rozgār kyā

khulne lage asrār-e-vafā dīda-o-dil par
jis din se ġham-e-hijr kī mushkil meñ paḌe ho

sirf zinda rahne ko zindagī nahīñ kahte
kuchh ġham-e-mohabbat ho kuchh ġham-e-jahāñ yaaro

dīvāne hue sahrā meñ phire ye haal tumhāre ġham ne kiyā
afsos magar is baat kā hai kyā tum ne kiyā kyā ham ne kiyā

tārīk huī saarī duniyā kyā maut huī mujh bekas kī
kam aise hue haiñ shahīd-e-vafā ġham jin kā ik aalam ne kiyā

ḳhushī chhanī hai to ġham kā bhī e'timād na kar
jo ruuh ġham se bhī uktā ga.ī to kyā hogā

agar maujeñ Dubo detīñ to kuchh taskīn ho jaatī
kināroñ ne Duboyā hai mujhe is baat kā ġham hai

kyuuñ nahīñ letā hamārī tū ḳhabar ai be-ḳhabar
kyā tire āshiq hue the dard-o-ġham khāne ko ham

tasavvur ke sahāre yuuñ shab-e-ġham ḳhatm kī maiñ ne
jahāñ dil kī ḳhalish ubhrī tumheñ āvāz dī maiñ ne

aañsū na pī sakeñge ye tanhā.iyoñ kā zahr
baḳhshā hai ġham mujhe to koī ġham-shanās de

ho ke majbūr musalsal ġham-o-andoh se 'nāz'
zindagī ġharq-e-mai-o-jām huī jaatī hai