Tags-Gham

jo fasl-e-gul kī tamannā meñ ho ga.e barbād
vo bā-murād haiñ ġham un kā be-samar na samajh

shab-e-ġham-o-bar-e-shīrīn-e-jāñ salām tujhe
ḳhayāl abr se niklā hai māh-pāra-e-shab

shor hai dil meñ ġham ke nāloñ kā
alam uThte haiñ aaj hasrat ke

jo abr bhī uThtā hai kisī vādi-e-ġham se
vo kisht-e-masarrat hī pe barsāt kare hai

ik aag ġham-e-tanhā.ī kī jo saare badan meñ phail ga.ī
jab jism hī saarā jaltā ho phir dāman-e-dil ko bachā.eñ kyā

mai-kada dekhā to yād-e-ġham-e-yārāñ aa.ī
jaam chhalkā to lahū zaḳhm-e-jigar se niklā

jo dekhiye mire hamdam haiñ mere saath magar
uThā rahā huuñ maiñ bār-e-ġham-e-jahāñ tanhā

tirā ġham dil pe ifshā kar rahe haiñ
so dil se kār-e-duniyā kar rahe haiñ

hazāroñ rañj pai-dar-pai uThā kar
bas ik ġham kā mudāvā kar rahe haiñ

kuchh aisā hai ġham-e-tanhā.ī dar-pesh
ki ik aalam ko apnā kar rahe haiñ

kab lag ahbāb kā ġham mujh ko dikhāvegā falak
ḳhaak ho ga.e bahut aur haiñ so chalan-hār ka.ī

ġham-ḳhvār ban ga.e haiñ chhiḌakte the jo namak
kuchh aisī chāshnī mire zaḳhm-e-jigar meñ hai

guzre hue maah o saal ke ġham
tanhā.ī shab meñ jaag uTThe haiñ

jo ġham tum ne diyā us par tasadduq saikḌoñ ḳhushiyāñ
jo dukh tum se mile un ke muqābil meñ tarab kyā hai

khīñche mujhe maut zindagānī kī taraf
ġham ḳhud le jaa.e shādmānī kī taraf

ġham kī duniyā rahe ābād 'shakīl'
muflisī meñ koī jāgīr to hai

'rāhīl' ġham ke ba.ad ḳhushī bhī mile magar
is bahr-e-be-karāñ kā kinārā koī to ho

yūñhī guzre to sahl hai lekin
fursat-e-ġham ko bhī sabāt nahīñ

qaid-e-ġham-e-hayāt se ahl-e-jahāñ mafar nahīñ
aisī milī hai shām-e-ġham jis kī koī sahar nahīñ

na koī ḳhushī na malāl hai ki sabhī kā ek sā haal hai
tire sukh ke din bhī guzar ga.e mirī ġham kī raat bhī kaT ga.ī