Tags-Gham

dil ne bhī thak-hār ke āḳhir dar-darvāze band kiye
kaun ho ab is ġham kā nigahbāñ maiñ bhī sochūñ tū bhī soch

abhī ham to adū se bhī badal leñ
jo ġham ko ġham se dil ko dil se badle

nahīñ ḳhauf-e-shab-e-hijrāñ mujhe ab
mirī ġham-ḳhvār o hamdam ho ga.ī hai

yahī hālat hai ik muddat se 'mahrūm'
tabī.at ḳhūgar-e-ġham ho ga.ī hai

ek hañgāme pe mauqūf hai ghar kī raunaq
nauha-e-ġham hī sahī naġhma-e-shādī na sahī

purāne āshnā chehroñ ko yaad kar kar ke
hujūm-e-ġham meñ bhī dil ko sambhālte rahiye

koī bhī paas nahīñ to tirā ḳhayāl na ġham
ba-qaul-e-pīr-e-jahāñ-dīda ham visāl meñ haiñ

mujhe chhū ke vaqt guzar gayā zarā ruk ke umr nikal ga.ī
jo rahā to paas yahī rahā kabhī apnā dukh kabhī sab kā ġham

'asar' bhī rāh-rav-e-dasht-e-zindagānī hai
pahāḌ ġham kā dil-e-zār par uThā.e hue

ek sham-e-umīd jaisā tū
is pighaltī huī shab-e-ġham meñ

lab tak shikāyat-e-ġham-e-dil lā ke rah gayā
un kī nadāmatoñ pe maiñ sharmā ke rah gayā

un ke huzūr lab to mukarrar na khul sake
rūdād-e-ġham nigāh se dohrā ke rah gayā

jab hai miTnā hī to andāz hakīmāna sahī
ḳhalvat-e-ġham ke evaz gosha-e-mai-ḳhāna sahī

is gulshan-e-duniyā meñ shagufta na huā maiñ
huuñ ġhuncha-e-afsurda ki mardūd-e-sabā huuñ

ġham to ho had se sivā aur ashk-afshānī na ho
us se pūchho jis kā ghar jaltā ho aur paanī na ho

koī shai ek sī nahīñ rahtī
umr Dhaltī hai ġham badalte haiñ

aa shitābī siiñ vagarna majlis-e-ushshāq meñ
zulm hai ġham hai qayāmat hai ḳharābī ai sanam

ye ġham nahīñ hai ki ab āh-e-nā-rasā bhī nahīñ
ye kyā huā ki mire lab pe iltijā bhī nahīñ

ba-shakl-e-qissa-e-dār-o-rasan na ho mash.hūr
vo ik fasāna-e-ġham tum ne jo sunā bhī nahīñ