Tags-Gham

ġham-e-zamāna se fursat nahīñ magar phir bhī
'majīd' chal tujhe pīr-e-muġhāñ ne yaad kiyā

nā-sāz zamāne kā nahīñ ġham
haañ kaar zamāna-sāz kiije

ilāhī zindān-e-ġham se paave na jīte-jī vo kabhī rihā.ī
ki jis ke bahkā.e se ab us ne dil apnā ham se phañsā chhuḌāyā

pā.eñge ḳhushī bhī ham ranj-o-ġham bhī jheleñge
is jahān meñ jab tak apnā āb-o-dāna hai

āñkhoñ meñ abhī tak hai ḳhumār-e-ġham-e-jānāñ
jaise ki koī ḳhvāb-e-mohabbat se hai jaagā

ye ḳhulāsa hai daftar-e-ġham kā
kahīñ shikva hai iltimās kahīñ

shikast-e-sāz-e-mohabbat se sozish-e-ġham se
har ek āriz-e-gulgūñ se shabnam-ālūda

ġham meñ bhī ham ḳhush rahte haiñ
ġham sahne kī taab na dekho

shām-e-ġham kī baat ab kyuuñ ho 'shafaq'
har nafas talvār ho kar rah ga.ī

ġham-e-kaunain kā magar yārab
kyā mujhī ko javāb honā thā

zabt-e-ġham maut kā paiġhām huā jaatā hai
dil kī bātoñ meñ mirā kaam huā jaatā hai

kuchh aur phail ga.iiñ dard kī kaThin rāheñ
ġham-e-firāq ke maare jidhar se guzre haiñ

tum agar chāhte ho sab tumheñ hañs hañs ke mileñ
apnā ġham apne hī siine meñ chhupā.e rakhnā

ye hamārā hī kaleja hai ki tere ġham ko
dil kī mānind kaleje se lagā.e rakhnā

halqa-e-zanjīr se niklā na ye pā-e-junūñ
ġham nahīñ bāhar gayā go halqa-e-islām se

ye ġham phir se ubhartā jā rahā hai
mujhe hairān kartā jā rahā hai

kyā patā siina jalā detī hamārā ġham kī aag
ham jo apnī tarah 'āzar' us ko tanhā dekhte

fanā ke āḳhirī lamhe talak husain mire
rahegī ġham meñ tire kā.enāt sharminda

ye aañsū rok rakhe haiñ ba-mushkil din guzāre haiñ
tumheñ dikhte nahīñ haiñ jo sabhī vo ġham tumhāre haiñ

dostoñ kī rifāqateñ bhī durust
bhuul jaane kā ġham sivā lekin