Tags-Gham

ye rah-e-ġham ke ḳham-o-pech ajab haiñ jin ko
ḳhush-nazar sāyā-e-gesu-e-rasā kahte haiñ

pathrā.ī haiñ āñkheñ ġham kī shiddat se
rukā huā hai mausam saarā āñkhoñ meñ

bhulā diyā hai ġham-e-rozgār ne jis ko
vo dāstāñ mujhe phir yaad aa.ī jaatī hai

barbādiyoñ kā apne nasheman kī ġham nahīñ
tāmīr ho rahe haiñ gulistāñ na.e na.e

saaqī ko ḳhaas masnad-e-gul par jo aa.ī niiñd
sar-mastī-e-sharāb-e-ġham-e-mo'atabar ga.ī

piyā jo zahr-e-ġham-e-zīst añgbīñ kī tarah
nikhar gayā huuñ kisī rū-e-āsmāñ kī tarah

maiñ ġham kī aag meñ ḳhāvar na jal ke raakh huā
vagarna maiñ bhī chamaktā kisī nagīñ kī tarah

kyuuñ matā-e-dil ke luT jaane kā koī ġham kare
shahr-e-dillī meñ to aise vāqiye hote rahe

zor se saañs jo letā huuñ to akasr shab-e-ġham
dil kī āvāz ajab dard bharī aatī hai

kis vaqt nahīñ rahtī āñkhoñ meñ vo mauj-e-ḳhūñ
kab dil se tire ġham ke paikān nikalte haiñ

kisī ḳhushī ko nahīñ hai agar sabāt yahāñ
maiñ sochtā huuñ ki ġham jāvedāñ banā.ūñ koī

aaj kyuuñ ashkoñ meñ hai aks-e-tabassum jalva-gar
aa ga.ī kyā apnī had par ġham ke mustaqbil kī baat

lagā kar dil judā honā na thī shart-e-vafā sāhab
ġham-e-furqat kī shiddat se karam jaur-o-sitam Thahre

pahle to shauharoñ ko paTātī haiñ bīviyāñ
tigunī kā naach phir ye nachātī haiñ bīviyāñ

honā hai ġham ko ḳhāk-basar jāgte raho
miltī hai zindagī kī ḳhabar jāgte raho

apne dāman meñ chhupā le mauj-e-ġham
qatra qatra zindagī jiinā hai kyā

to kyuuñ na ham pāñch saat din tak mazīd socheñ banāne se qabl
mirī chhaTī his batā rahī hai ye rishta TūTegā ġham banegā

bahār-e-gulshan-e-hastī hai qaa.em shādī-o-ġham se
jo gul ḳhandāñ hai gulshan meñ to giryāñ sham-e-mahfil meñ

haiñ hichkiyāñ bhī ġham kī aur aaheñ haiñ aañsū bhī
dekho ġharīb-e-shahr ki sab qāfile ga.e

bāda-e-ġham ne bhar diyā 'jauhar'
zindagānī kā merī paimāna