Tags-Gham

'kañval' ḳhushī kī huā kartī hai yūñhī takmīl
ġham-e-hayāt ke har bahr-e-be-karāñ se guzar

kuchh to ai yaar ilāj-e-ġham-e-tanhā.ī ho
baat itnī bhī na baḌh jaa.e ki rusvā.ī ho

ab ke sāvan to barastā huā yuuñ lagtā hai
āsmāñ par bhī tire ġham kī ghaTā chhā.ī ho

aa gale lag jā hamāre tīrgī-e-shām-e-ġham
raushnī ke naam par dhoke bahut khāte haiñ ham

ġham kā sūraj Dhalā dard kā chāñd bhī bujh chale āñsuoñ ke diye aaj bhī
aur isī soch meñ ab sahar aa.egī ab sahar aa.egī ab sahar aa.egī

ġham-ḳhān-e-jahāñ meñ vaq.at hī kyā hamārī
ik nā-shunīda uf haiñ ik āh-e-be-asar haiñ

tū apnī vaz.a ko rusvā-e-arz-e-hāl na kar
kisī ko tere ġham-e-be-basī se kyā lenā

hamīd asl meñ ik ġham ko hai sabāt yahāñ
jise davām nahīñ us ḳhushī se kyā lenā

mere andar hī to kahīñ ġham hai
kis se pūchhūñ tirā nishāñ jānāñ

tū mire ġham meñ na hañstī huī āñkhoñ ko rulā
maiñ to mar mar ke bhī jī saktā huuñ merā kyā hai

kū-e-butāñ se tauf-e-haram ko chale to ham
lekin kamāl-e-hasrat o hirmān o ġham ke saath

kuchh aise ġham bhī hote haiñ jo ashkoñ meñ nahīñ Dhalte
sharāre ban ke lekin raqs karte haiñ rag-e-jāñ meñ

sā.at-e-aish-e-do-roza tirī hājat kyā hai
ġham-e-jāved nikālegā mirā kaam ki tū

mujh siiñ ġham dast-o-garebāñ na huā thā so huā
chaak siine kā numāyāñ na huā thā so huā

kuchh be-kasī-e-rāh-rau-e-ġham na pūchhiye
miltī nahīñ hai gard-e-rah-e-kārvāñ talak

shāyad baqā-e-ishq isī shai ko kahte haiñ
ham bhuul baiThe ġham meñ zamān-o-makāñ talak

yaaro hamārī ziist kā qissa hai muḳhtasar
mahdūd hai hadīs-e-ġham-e-dil-barāñ talak

ye hākim bhī dost hai merā ye nāseh bhī merā hamdam
kitne hī ġham-ḳhvār paḌe haiñ ek tire bīmār ke pīchhe

hue jab fart-e-ġham se ḳhushk aañsū
vo ye samjhe ki mujh ko ġham nahīñ hai

bhalā vo zindagī kyā zindagī hai
ḳhushī ke saath jis meñ ġham nahīñ hai