Tags-Gham

zarre zarre kī zabāñ par naġhma-e-jāñ-soz hai
dasht-zār-e-ġham ne aisī ḳhaak chhanvā.ī ki bas

inhīñ tārīk rātoñ se nikal aa.egā ik sūraj
añdheroñ ke safīne par shab-e-ġham paar karte haiñ

tujhe bhī dekh liyā ham ne o ḳhudā-e-ajal
ki terā zor chalā bhī to ahl-e-ġham pe chalā

kyā kahte haiñ vo bekas-o-nāchār ki jin ko
is shahr ke basne se ġham-e-be-vatanī hai

mudda.ā sāmne un ke nahīñ aatā lab tak
baat bhī kyā ġham-e-dil hai ki sunā bhī na sakūñ

ye hasrat hai sajā luuñ apne hoñToñ par hañsī meñ bhī
ghaḌī bhar ko mire dil se agar ehsās-e-ġham nikle

ab nahīñ hai ḳhushk āñkhoñ meñ sivā vahshat ke kuchh
intihā-e-ġham ne kyā dariyā ko sahrā kar diyā

vasvase ummīd ke dam se jo the sab miT ga.e
intihā-e-dard ne ġham kā mudāvā kar diyā

dil to thā ik qatra-e-ḳhūñ kyā haqīqat us kī thī
tere ġham ne qulzum-e-zaḳhḳhār jaisā kar diyā

dāġh-e-dil ḳhūn-e-jigar ātish-e-ġham dard-e-firāq
ham ko bhī ishq kī daulat se milā kyā kyā kuchh

ik nayā ġham roz miltā hai purāne ġham ke saath
silsila TūTegā kab is dard kī zanjīr kā

maiñ karūñ zabt idhar un ko pasīna aa.e
chāhiye yuuñ ġham-e-pinhāñ ko numāyāñ honā

ġham-e-hayāt-o-ġham-e-dahr baḳhshne vaale
ik aisā ġham bhī atā kar jo dil ko raas aa.e

ham ko jaldī ne maut kī maarā
aur jiite to aur ġham sahte

titliyāñ uḌ ga.iiñ ye ġham le kar
ab ke phūloñ meñ baas kam kam hai

kyā vahī mauj-e-balā kyā vahī mañjdhār kā ḳhauf
ġham ke dariyāoñ se ab paar utarnā hogā

ġham pe mauqūf hai tāsīr-e-bayāñ
ġham se hai raunaq-e-bāzār-e-ḳhayāl

har ḳhushī kī mahfil meñ qahqahe luTāte haiñ ḳhud hī lūTte bhī haiñ
ġham kī majlisoñ meñ bhī sab kā apnā apnā sar apnā apnā shāna hai

unheñ kyuuñ na ho dilrubā.ī se nafrat
ki har dil meñ vo ġham alam dekhte haiñ

ġham se badlī hai mirī shakl to be-ḳhauf-o-ḳhatar
din ko bhī aate haiñ sau baar tire kūche meñ