Tags-Gham

kyā kahūñ kis tarah se jiitā huuñ
ġham ko khātā huuñ aañsū piitā huuñ

ġham-e-hayāt ko phailā de āsmānoñ tak
dil-e-tabāh ko vus.at bhī kuchh ziyāda de

na the āshiq kisī be-dād par ham jab talak 'tābāñ'
hamāre dil ke ta.iiñ kuchh dard-o-ġham tab tak na thā hargiz

ġham-e-butāñ meñ kaTī umr aur ab dil ko
shikāyat-e-ġham-e-duniyā hai dekhiye kyā ho

hujūm-e-ġham meñ kahāñ fursat-e-tabassum bhī
zarā bhī yaad nahīñ kab mujhe hañsī aa.ī

ġham-e-hayāt salāmat tujhe ḳhudā rakkhe
tire sabab ġham-e-jānāñ meñ puḳhtagī aa.ī

roz-e-maulūd se saath apne huā ġham paidā
lāla-sāñ daaġh uThāne ko hue ham paidā

maiñ jo rotā huuñ mire zaḳhm-e-jigar hañste haiñ
shādī o ġham se kyā hai mujhe tauam paidā

dard sar meñ ho kisī ke to mire dil meñ ho dard
vāste mere huā hai ġham-e-ālam paidā

jāñchtā huuñ vus.at-e-dil hamla-e-ġham ke liye
imtihāñ hai ranj-o-hirmāñ kī farāvānī mujhe

qaum kā ġham mol le kar dil kā ye aalam huā
yaad bhī aatī nahīñ apnī pareshānī mujhe

ruuh kā ġham ma-e-gulfām se kam kyā hotā
koī tiryāk ba-juz vasl-e-sanam kyā hotā

ġhunche ġhunche meñ hai poshīda salīb-e-ġham-e-dost
kis ne phūloñ meñ ye qātil kī adā rakkhī hai

na the āshiq kisī be-dād par ham jab talak 'tābāñ'
hamāre dil ke ta.iiñ kuchh dard-o-ġham tab tak na thā hargiz

jab aap muskurā.e ġham-e-dil kī baat par
dil dard ko chhupāne ke qābil nahīñ rahā

ham jaate haiñ bār-e-ġham uThā.e
ai shahr-e-nigār yaad rakhnā

khoyā ġham-e-rifāqat dekho kamāl apnā
bahkā diyā hai sab ko dikhlā ke haal apnā

tirā ḳhayāl rahā dil kī dhaḌkanoñ ke qarīñ
so tere ġham se kabhī be-ḳhabar nahīñ huī maiñ

ek ham hī nahīñ phirte haiñ liye qissa-e-ġham
un ke ḳhāmosh laboñ par bhī fasāne se mile

naġhma-hā-e-ġham ko bhī ai dil ġhanīmat jāniye
be-sadā ho jā.egā ye sāz-e-hastī ek din